AOKA shtabida Tashqi ishlar vazirligi axborot xizmati rahbari Avazbek Hojimatov Rossiyada mehnat qilayotgan o‘zbekistonliklarning patentlari borasidagi savollarga javob qaytardi.
Avazbek Hojimatov Rossiya hududida vaqtincha bo‘lish muddati uzaytirilgani, yangi patent rasmiylashtirish tartibi yengillashtirilganini ma’lum qildi.
“Rossiyada koronavirus infeksiyasining keng tarqalishining oldini olish maqsadida 30-aprelgacha barcha tashkilotlarning faoliyati to‘xtatildi. Natijada Rossiyadagi hamyurtlarimiz vaqtincha ishsiz qolmoqda va bu holat ularning daromadlariga ham o‘z ta’sirini ko‘rsatadi.
O‘zbekiston Tashqi ishlar vazirligi ushbu vaziyat sabab Rossiya tomoniga mehnat patenti bo‘yicha to‘lovlar muhlatini ishlanmaydigan davr tugab, mehnat bozori tiklangunicha kechiktirish, shu vaqt mobaynida mehnat muhojirlarini ma’muriy javobgarlikka tortmaslikni so‘rab, rasmiy nota yubordi.
Hozirgi paytda mazkur masala Rossiya Federatsiyasining vakolatli organlari tomonidan ko‘rib chiqilmoqda”, — degan Tashqi ishlar vazirligi axborot xizmati rahbari.
Shuningdek, vazirlik vakili O‘zbekistonga qaytish maqsadida Novosibirsk aeroportida to‘plangan o‘zbekistonliklarning haydab chiqarilishi holati bo‘yicha ham izoh berdi.
“O‘zbekistonning Novosibirsk shahridagi Bosh konsulxonasi yordami bilan 2020-yil 22-mart kuni ‘Tolmachyovo’ aeroportida bo‘lgan O‘zbekistonning 253 nafar fuqarosining barchasi charter reys bilan qaytarilgan edi.
Respublika maxsus komissiyasining 30-martdan 20-aprelga qadar mamlakatimizdagi barcha aeroportlarni vaqtincha yopish va aviareyslarni to‘xtatish to‘g‘risidagi qarori qabul qilinganiga qaramay, O‘zbekiston fuqarolarining Novosibirsk aeroportiga kelishi davom etmoqda.
2-aprel kuni ‘Tolmachyovo’ aeroporti rahbariyati tomonidan ichki reyslar uchun elektron chiptaga ega bo‘lgan yo‘lovchilardan boshqa shaxslarning aeroportga kirishini cheklash to‘g‘risida qaror qabul qilindi. Shu kunning o‘zida Bosh konsulxona vakillari aeroportga kelib, barcha 87 nafar o‘zbekistonlikni xostelga joylashtirgan. Vaziyat nazoratga olingan, diplomatlarimiz ularning holidan xabar olib turibdi”, — dedi Avazbek Hojimatov.
Izoh (0)