Alisher Qodirov: “IIV jarimalarni oshiraverishdan ko‘ra hukumatga avtoyo‘llarni zamonaviy talablarga moslashtirish bo‘yicha tashabbus bersa, ma’qulroq bo‘lardi”

Oliy Majlis Qonunchilik palatasi spikeri o‘rinbosari, O‘zbekiston “Milliy tiklanish” demokratik partiyasi fraksiyasi rahbari Alisher Qodirov Telegram kanalida Ichki ishlar vazirligi Ma’muriy javobgarlik to‘g‘risidagi kodeksning 128-moddasi 5-qo‘shimchaning birinchi va uchinchi qismlariga o‘zgartirish kiritishni tashabbus qilayotgani haqida post yozdi.

• 128-modda 5-qo‘shimchaning birinchi qismida tezkor va maxsus xizmat transport vositalarining to‘siqsiz o‘tib ketishiga xalaqit qilinsa, jarimaning amaldagi 5 barobar bazaviy hisoblash miqdorini 10 barobargacha ko‘tarish;
• uchinchi qismida shu holat takroran sodir etilsa, amaldagi 20 baravar bazaviy hisoblash miqdorini 25 barobarga ko‘tarish taklif qilinmoqda.

Ichki ishlar vazirligi jarimalarni oshiraverishdan ko‘ra hukumatga avtoyo‘llarni zamonaviy talablarga moslashtirish bo‘yicha tashabbus bersa, ma’qulroq bo‘lar edi.

“Qonunchilik palatasiga kiritilayotgan ushbu taklifni rad etishga tayyorgarlik ko‘ryapmiz”, — deya yozgan Alisher Qodirov.