Bugun, 28-mart kuni, erta tongdan Qurolli Kuchlar bosh shtabi radiatsion, kimyoviy va biologik muhofaza qo‘shinlari hamda Mudofaa vazirligi Sanitariya epidemiologiya nazorat markazi hamkorligida taktik o‘quv mashg‘uloti boshlandi. Bu haqda Mudofaa vazirligi axborot va ommaviy kommunikatsiyalar departamenti “Daryo”ga ma’lum qildi.
Taktik mashg‘ulotdan maqsad respublikadagi jamoat joylari, bozorlarda dezinfeksiya ishlarini olib borish, koronavirus infeksiyasining kirib kelishi va tarqalishining oldini olish, fuqarolar xavfsizligi, salomatligini ta’minlashdir.
Erta tongdan boshlangan maxsus o‘quv mashg‘ulotida maxsus mutaxassislar 10 dan ortiq texnika, kerakli uskunalar bilan Toshkentdagi jamoat joylarida dezinfeksiya ishlarini amalga oshirdi.
Amaliy taktik o‘quv mashg‘ulotida yurt himoyachilari “Yunusobod”, “Eski Jo‘va”, “Oloy” dehqon bozorlaridagi serqatnov ko‘chalar, yerosti o‘tish joylari hamda chiqindixonalarda to‘liq dezinfeksiya ishlarini amalga oshirdi. Mudofaa vazirligi harbiy xizmatchilari ishtirokida boshlangan taktik o‘quv mashg‘ulotlari butun respublika bo‘ylab davom etmoqda.
Avvalroq Toshkent shahrini Milliy gvardiyaning maxsus texnikalari yordamida dezinfeksiya qilish boshlangani haqida xabar berilgandi.
Mavzuga doir: Qashqadaryoda koronavirusga qarshi kurash va aholi yashash manzillarni dezinfeksiyalash uchun maxsus guruhlar tashkil etildi
Izoh (0)