Бугун, 28 март куни, эрта тонгдан Қуролли Кучлар бош штаби радиацион, кимёвий ва биологик муҳофаза қўшинлари ҳамда Мудофаа вазирлиги Санитария эпидемиология назорат маркази ҳамкорлигида тактик ўқув машғулоти бошланди. Бу ҳақда Мудофаа вазирлиги ахборот ва оммавий коммуникациялар департаменти «Дарё»га маълум қилди.
Тактик машғулотдан мақсад республикадаги жамоат жойлари, бозорларда дезинфекция ишларини олиб бориш, коронавирус инфекциясининг кириб келиши ва тарқалишининг олдини олиш, фуқаролар хавфсизлиги, саломатлигини таъминлашдир.
Эрта тонгдан бошланган махсус ўқув машғулотида махсус мутахассислар 10 дан ортиқ техника, керакли ускуналар билан Тошкентдаги жамоат жойларида дезинфекция ишларини амалга оширди.
Амалий тактик ўқув машғулотида юрт ҳимоячилари «Юнусобод», «Эски Жўва», «Олой» деҳқон бозорларидаги серқатнов кўчалар, ерости ўтиш жойлари ҳамда чиқиндихоналарда тўлиқ дезинфекция ишларини амалга оширди. Мудофаа вазирлиги ҳарбий хизматчилари иштирокида бошланган тактик ўқув машғулотлари бутун республика бўйлаб давом этмоқда.
Аввалроқ Тошкент шаҳрини Миллий гвардиянинг махсус техникалари ёрдамида дезинфекция қилиш бошлангани ҳақида хабар берилганди.
Мавзуга доир: Қашқадарёда коронавирусга қарши кураш ва аҳоли яшаш манзилларни дезинфекциялаш учун махсус гуруҳлар ташкил этилди
Изоҳ (0)