Qashqadaryo viloyatida koronavirusga qarshi kurash va aholi yashash manzillarni dezinfeksiyalash maqsadida 65 ta maxsus guruh tashkil etildi, deb xabar berdi “Daryo” muxbiri.
Viloyat hokimi Zoir Mirzayevning ma’lumot berishicha, viloyatda dezinfeksiya ishlari uchun 3 tonna xlor, 700 dona maxsus himoya kiyimi, 310 dona purkagich apparat va 40 dona kichik suv idishi tayyorlangan.
“Mazkur dezinfeksiyalash vositalari 15 kunga yetadi. Bugundan boshlab ishchi guruhning 40 tasi tumanlarga chiqib, dezinfeksiyalash ishlarini bajaradi ”, — dedi Zoir Mirzayev.
Ma’lum qilinishicha, har biri 5 tadan purkagich apparat bilan ta’minlangan guruhlar tarkibida harbiylar, 60 nafar FVB xodimi, 65 nafar IIB xodimi hamda 30 nafar sanitar mutaxassis mavjud.
“28-mart kuni soat 00:01 dan boshlab Qarshi shahriga kirish-chiqish to‘xtatiladi. Shaharni tumanlar bilan bog‘lovchi 7 ta postda qattiq qo‘riqlash amalga oshiriladi. Buning barchasi aholi salomatligi uchun qilinmoqda”, — deydi Zoir Mirzayev.
Izoh (0)