Tarmoqlarda koronavirus bilan bog‘liq tarqalayotgan feyk xabarlar haqida ma’lumot berildi
O‘zbekistonda soxta axborotlarga raddiyalar uchun “Antifake.uz” deb nomlangan Telegram kanal tashkil etildi. Kanalda asosan ijtimoiy tarmoqlarda tarqalayotgan koronavirus bilan bog‘liq feyk xabarlar haqida ma‘lumot berilmoqda.
Foto: “Daryo”
Kanalda so‘nggi kunlarda tarqatilyotgan quyidagi xabarlar yolg‘on ekanligi aniqlanib, ularga raddiya berilgan:
“5-apreldan O‘zbekiston bo‘ylab barcha aeroportlar o‘z ish faoliyatini tiklaydi”;
“Tadbirkor Fattoh Shodiyev O‘zbekistonda koronavirus infeksiyasiga qarshi kurash uchun 200 million dollar miqdorida moliyaviy yordam berdi”;
“24-martdan boshlab 2 oy mobil aloqa, internetlar mutlaqo bepul”;
“Zanjabil (imbir) iste’mol qilib yuradigan kishilarga koronavirus yuqmaydi”;
“Korzinka.uz supermarketlar tarmog‘ida ishlovchi xodim koronavirusga chalindi”;
“Koronavirusning davosi topildi”;
“Salqin ichimliklar ishlab chiqaruvchilar tomonidan koronavirus infeksiyasi ataylab tarqatilyapti”.
Avvalroq koronavirus pandemiyasi sabab O‘zbekiston Respublikasining Jinoyat, Jinoyat-protsessual hamda Ma’muriy javobgarlik to‘g‘risidagi kodekslariga o‘zgartish va qo‘shimchalar kiritilgani haqida xabar berilgandi. Qonunga muvofiq, karantinli va inson uchun xavfli bo‘lgan boshqa yuqumli kasalliklar tarqalishi haqida aholi orasida asossiz vahima tarqalishining oldini olish, jamoat xavfsizligini ta’minlash hamda mutasaddi idoralarning normal faoliyat yuritishi uchun sharoit yaratish maqsadida Jinoyat kodeksi 244-(5)-modda bilan to‘ldirilgan. Bu borada haqiqatga to‘g‘ri kelmaydigan ma’lumotlarni tarqatgan inson bazaviy hisoblash miqodorining 200 baravarigacha (44 million 600 ming so‘m) miqdorda jarimaga tortiladi yoki 2 yilgacha axloq tuzatish ishlari bilan jazolanadi.
AOKA direktorining birinchi o‘rinbosari Dilshod Saidjonovning koronavirus haqida yolg‘on axborot tarqatganlarga qonunchilikda qanday jazo tayinlanishini eslatib o‘tgandi.
Izoh (0)