Тармоқларда коронавирус билан боғлиқ тарқалаётган фейк хабарлар ҳақида маълумот берилди

Ўзбекистонда сохта ахборотларга раддиялар учун «Antifake.uz» деб номланган Telegram канал ташкил этилди. Каналда асосан ижтимоий тармоқларда тарқалаётган коронавирус билан боғлиқ фейк хабарлар ҳақида маълумот берилмоқда.

Каналда сўнгги кунларда тарқатилётган қуйидаги хабарлар ёлғон эканлиги аниқланиб, уларга раддия берилган:

• «5 апрелдан Ўзбекистон бўйлаб барча аэропортлар ўз иш фаолиятини тиклайди»;
• «Тадбиркор Фаттоҳ Шодиев Ўзбекистонда коронавирус инфекциясига қарши кураш учун 200 миллион доллар миқдорида молиявий ёрдам берди»;
• «24 мартдан бошлаб 2 ой мобил алоқа, интернетлар мутлақо бепул»;
• «Занжабил (имбир) истеъмол қилиб юрадиган кишиларга коронавирус юқмайди»;
• «Korzinka.uz супермаркетлар тармоғида ишловчи ходим коронавирусга чалинди»;
• «Коронавируснинг давоси топилди»;
• «Салқин ичимликлар ишлаб чиқарувчилар томонидан коронавирус инфекцияси атайлаб тарқатиляпти».

Аввалроқ коронавирус пандемияси сабаб Ўзбекистон Республикасининг Жиноят, Жиноят-процессуал ҳамда Маъмурий жавобгарлик тўғрисидаги кодексларига ўзгартиш ва қўшимчалар киритилгани ҳақида хабар берилганди. Қонунга мувофиқ, карантинли ва инсон учун хавфли бўлган бошқа юқумли касалликлар тарқалиши ҳақида аҳоли орасида асоссиз ваҳима тарқалишининг олдини олиш, жамоат хавфсизлигини таъминлаш ҳамда мутасадди идораларнинг нормал фаолият юритиши учун шароит яратиш мақсадида Жиноят кодекси 244-(5)-модда билан тўлдирилган. Бу борада ҳақиқатга тўғри келмайдиган маълумотларни тарқатган инсон базавий ҳисоблаш миқодорининг 200 бараваригача (44 миллион 600 минг сўм) миқдорда жаримага тортилади ёки 2 йилгача ахлоқ тузатиш ишлари билан жазоланади.АОКА директорининг биринчи ўринбосари Дилшод Саиджоновнинг коронавирус ҳақида ёлғон ахборот тарқатганларга қонунчиликда қандай жазо тайинланишини эслатиб ўтганди.