“Tabassum har qanday virusni o‘ldiradi”. Irina Sheyk yangi fotoloyihada Italiyani qo‘llab-quvvatladi

34 yoshli fotomodel Irina Sheyk Italiyada chop etiladigan jurnal muqovasida noodatiy obrazda namoyon bo‘ldi, deb yozadi Cosmopolitan.

Irina koronavirus pandemiyasi davrida yevropaliklarni qo‘llab-quvvatlash uchun fotoloyihada ishtirok etdi.

Top-model muqovada maykada, kalta soch turmagida ko‘rinish berdi. “Vizajistlar Irinaga chiroyli makiyaj qildi, biroq rossiyalik modelning eng asosiy bezagi bu uning takrorlanmas tabassumi bo‘ldi”, — deyiladi xabarda.

“Italiyada jasorat va muhabbat tantanasi”. Irina Vanity Fair uchun rasmini shunday deb atadi.

Ushbu pozitiv surat Irina Sheykning muxlislariga manzur bo‘ldi. “Sening tabassuming barcha viruslarni o‘ldiradi va millat ruhini ko‘taradi”. “Betakror!”, “Chelyabinskda mana shunday go‘zallar dunyoga keladi!”, deya izohladi Instagram foydalanuvchilari Irinaning rasmini.

Jurnal tahririyati Sheykdan boshqa yulduzlar bilan ham fotosessiya uyushtirdi. Jumladan, jurnal muqovasida Robert de Niro, Stella Makkartni, Andrea Bochelli, Jonatan Anderson va boshqa mashhur shaxslarning suratlari ham aks etadi.

Yulduzlarning surati ostiga I love Italia (Men Italiyani sevaman) yozuvi hamda koronavirus epidemiyasidan eng ko‘p zarar ko‘rgan dunyo shaharlari nomlari tushirilgan.

Nashr shu tarzda koronavirus pandemiyasi davrida jahon yulduzlarini birlashtirish va o‘quvchilariga ko‘tarinki kayfiyat baxsh etishga qaror qildi.

Jurnalning noodatiy soni Italiyadagi kiosklarda bepul tarqatiladi.

Eslatib o‘tamiz, Italiyada o‘tgan bir sutka ichida koronavirus oqibatida 475 kishi vafot etdi. Mamlakat hududida koronavirus bilan kasallanganlar soni 28,7 ming kishidan oshgan.

O‘zbekistonda koronavirusga chalinganlar soni 23 kishiga yetdi.