34 ёшли фотомодел Ирина Шейк Италияда чоп этиладиган журнал муқовасида ноодатий образда намоён бўлди, деб ёзади Cosmopolitan.
Ирина коронавирус пандемияси даврида европаликларни қўллаб-қувватлаш учун фотолойиҳада иштирок этди.
Топ-модел муқовада майкада, калта соч турмагида кўриниш берди. «Визажистлар Иринага чиройли макияж қилди, бироқ россиялик моделнинг энг асосий безаги бу унинг такрорланмас табассуми бўлди», — дейилади хабарда.
«Италияда жасорат ва муҳаббат тантанаси». Ирина Vanity Fair учун расмини шундай деб атади.
Ушбу позитив сурат Ирина Шейкнинг мухлисларига манзур бўлди. «Сенинг табассуминг барча вирусларни ўлдиради ва миллат руҳини кўтаради». «Бетакрор!», «Челябинскда мана шундай гўзаллар дунёга келади!», дея изоҳлади Instagram фойдаланувчилари Иринанинг расмини.
Журнал таҳририяти Шейкдан бошқа юлдузлар билан ҳам фотосессия уюштирди. Жумладан, журнал муқовасида Роберт де Ниро, Стелла Маккартни, Андреа Бочелли, Жонатан Андерсон ва бошқа машҳур шахсларнинг суратлари ҳам акс этади.
Юлдузларнинг сурати остига I love Italia (Мен Италияни севаман) ёзуви ҳамда коронавирус эпидемиясидан энг кўп зарар кўрган дунё шаҳарлари номлари туширилган.
Нашр шу тарзда коронавирус пандемияси даврида жаҳон юлдузларини бирлаштириш ва ўқувчиларига кўтаринки кайфият бахш этишга қарор қилди.
Журналнинг ноодатий сони Италиядаги киоскларда бепул тарқатилади.
Эслатиб ўтамиз, Италияда ўтган бир сутка ичида коронавирус оқибатида 475 киши вафот этди. Мамлакат ҳудудида коронавирус билан касалланганлар сони 28,7 минг кишидан ошган.
19 март куни Жаҳон соғлиқни сақлаш ташкилоти коронавирусга қарши вакциналарнинг илк синовлари бошланганини маълум қилди. Хитойнинг эпидемия ўчоғи ҳисобланган Хубэй провинциясида вазият тобора яхшиланмоқда. Хусусан Хубэй провинциясида ва Ухань шаҳрида сўнгги бир кун ичида касалик юқтириш бўйича бирорта янги ҳолат аниқланмади.Ўзбекистонда коронавирусга чалинганлар сони 23 кишига етди.
Изоҳ (0)