“Ikki million so‘mga bir oy ishlaydigan xalq artistlari bor”. Manzura aktrisa Durdona Qurbonovaning 200 dollar uchun klipda tushishni rad etgani to‘g‘risida

Xonanda Manzura jurnalist Feruz Muhammadga bergan intervyusida aktrisa Durdona Qurbonova 200 dollar uchun klipga tushishni rad etgani to‘g‘risidagi gap-so‘zlarga o‘z munosabatini bildirdi.

Bizda klip olinadi. Masalan, men Dilmurod A’zamov bilan ishlayapman. Ahamiyat bergan bo‘lsangiz, u birdaniga to‘rtta klip olsa kerak. Bir vaqtning o‘zida ko‘pchillikka klip oladi. Uni yordamchilari bor, albatta. Yordamchilari esa aktrisalarga murojaat qilib, narx-navoni surishtirishadi… Masalan, men Durdona Qurbonovani hayotda ko‘rmaganman ham. Men uni tanimayman ham. Klipmeyker administratoriga vazifa qo‘yadi. Dilmurod bir vaqtda ko‘p klip olgani sabab hammasini o‘zi qila olmaydi. Bu ishni administrator qiladi. U aynan kimning klipiga so‘ragani ham savol ostida. Durdona Qurbonovani “Million”da chiqan qiz deyishdi. Men uni “Million”da chiqqanini ko‘rmaganman, ya’ni o‘sha konsertini…

Bizga aktrisalar ko‘rsatiladi, menga “mana shunaqa aktrisa” bor, “yangi yuz” deyishadi. Bundoq qarab, u qaysi kliplarda o‘ynaganini eslayman, bu qiz rolni eplaydi deyman. Durdona Qurbonova meni oxirgi kliplarimdagi vazifani eplay olmasdi. Men u qizning mahoratiniyam, u yaxshi yoki yomon aktrisa ekanligini ham bilmayman.

Durdona judayam yosh, oxirgi kliplarimda qizlar kaltak yeyapti, hayotdan kaltak yeyapti, mashinalarda avariya bo‘lyapti, yuzida xorlik, qiyinchilik bor. Durdona yosh qizcha bo‘lsa, uni qanday qilib klipimga olishim mumkin?

Keyin 200 dollar juda kam pul degani haqida eshitib qoldim. Bu yaxshi gap emasda. 200 dollar hozir deyarli 2 million so‘m pul degani. Davlat oyligi shunchaga teng hozir. Masalan, bizda xalq aktrisalari bor, teatrda bir oy shu oylikka ishlaydi. Ular sizningcha Durdona Qurbonovadan kamroq harakat qiladimi?!

Manzura, xonanda

Eslatib o‘tamiz, Durdona Qurbonova “Million” kulgi jamoasining 2018-yilgi konsert dasturida bir mavsum chiqish qilgan. Jamoa sardori Davron Kabulov intervyularining birida Kumush va Durdona Qurbonova sinov muddatiga olingani va ular bilan hamkorlik boshqa davom ettirilmasligini ma’lum qilgandi.