Prodyuser Jon Landau “Avatar” filmining Yangi Zelandiyadagi aprel oyida suratga olinishi rejalashtirilgan sahnalari koronavirus pandemiyasi tufayli to‘xtatilganini ma’lum qildi, deb xabar berdi “KinoPoisk”.
Uning so‘zlariga ko‘ra, ushbu qaror birinchi navbatda koronavirus tarqalishining oldini olish, shuningdek, suratga olish guruhi va aktyorlar salomatligini ta’minlash maqsadida qabul qilingan. Hozircha suratga olish ishlari qachon qayta boshlanishi noma’lum.
“Biz koronavirus bilan bog‘liq vaziyat yaxshilanishi bilan suratga olish jarayonini boshlaymiz. Suratga olish guruhining salomatligi biz uchun birinchi o‘rinda”, — deydi film prodyuseri.
“Avatar”ning barcha — to‘rtta sikvellarining suratga olish jarayoni bir vaqtda amalga oshirilmoqda. Suratga olish jarayonining qoldirilishi ilk sikvel — “Avatar 2”ning taqdimoti sanasiga ta’sir ko‘rsatmaydi: Film Amerikada 2021-yilning 17-dekabrida tomoshabinlarga taqdim etiladi.
“Avatar 2”ning syujeti haqida umumiy ma’lumotlargina oshkor qilingan. Undagi voqealar ilk filmdagi voqealardan bir necha yil o‘tib, davom etadi. Bosh qahramonlar Jeyk va Neytiri qiz farzandli bo‘ladi.
Taxmin qilinishicha, filmda Pandora aholisi qimmatli resursga ega chiqishga uringan insoniyat bilan bellashadi.
Avvalroq AQShning barcha shtatlarida koronavirus aniqlangan edi, shuningdek, bu infeksiya kirib bormagan Yevropa mamlakati qolmadi.
Dunyo bo‘yicha koronavirusga chalinganlar soni 198 mingdan oshdi. Xubeyda bir sutkada bir bemor aniqlandi, Ispaniyada esa 182 kishi vafot etdi.
O‘zbekistonda hozirga qadar koronavirusni yuqtirish bilan bog‘liq 15 ta holat qayd etildi.
Izoh (0)