Rossiya va boshqa xorijiy mamlakatlarda bo‘lib qaytgan va ayni paytda tibbiy nazoratga olingan fuqarolarning bir guruhi 17-mart, seshanba kuni, Toshkentdan Samarqandga keltiriladi, deb xabar berdi “Xalq so‘zi Online”.
Qayd etilishicha, ular belgilangan tartibda kamida 14 kun karantinda bo‘ladi. Bugungi kundagi vaziyat talabidan kelib chiqib, ushbu fuqarolarning yaqinlari va oila a’zolari bilan ko‘rishishlariga yo‘l qo‘yilmaydi.
Samarqand viloyati hokimi Samarqand tumani “Do‘stlik” yozgi oromgohi hududida boshqa davlatlardan to‘g‘ridan to‘g‘ri Samarqandga kirib kelgan fuqarolarni belgilangan tartibda tibbiy nazorat va tashxis o‘tkazish uchun 14 kunlik karantinda saqlash maqsadida tayyorlanayotgan muassasada bo‘lib, bu yerda yaratilayotgan shart-sharoitlar bilan tanishdi. Mas’ullarga zaruriy ko‘rsatmalar berildi, deyiladi xabarda.
Ma’lumot uchun, 17-mart kuni O‘zbekistonda koronavirus infeksiyasiga chalingan bemorlar soni 11 nafarga yetdi.
O‘zbekistonda koronavirus infeksiyasiga chalinish bilan bog‘liq ilk holat 15-mart, yakshanba kuni, soat 06:00 da tasdiqlangan edi. Birinchi bemor 11-mart kuni Fransiyadan qaytgan ayol bo‘ldi. Keyinchalik uning o‘g‘li, qizi, turmush o‘rtog‘i, nevarasi va yana bir qarindoshida ham koronavirus infeksiyasi aniqlangani ma’lum qilindi.
Bundan tashqari, 15-mart kuni tongda Istanbuldan uchib kelgan o‘zbekistonlik erkakda, shuningdek, 14-mart kuni tongda Londondan uchib kelgan O‘zbekiston fuqarosida ham koronavirus aniqlangan. Sog‘liqni saqlash vazirining ma’lum qilishicha, 16-mart holati bo‘yicha 5,6 mingdan ortiq odam karantinga olingan.
Izoh (0)