Россия ва бошқа хорижий мамлакатларда бўлиб қайтган ва айни пайтда тиббий назоратга олинган фуқароларнинг бир гуруҳи 17 март, сешанба куни, Тошкентдан Самарқандга келтирилади, деб хабар берди «Халқ сўзи Online».
Қайд этилишича, улар белгиланган тартибда камида 14 кун карантинда бўлади. Бугунги кундаги вазият талабидан келиб чиқиб, ушбу фуқароларнинг яқинлари ва оила аъзолари билан кўришишларига йўл қўйилмайди.
Самарқанд вилояти ҳокими Самарқанд тумани «Дўстлик» ёзги оромгоҳи ҳудудида бошқа давлатлардан тўғридан-тўғри Самарқандга кириб келган фуқароларни белгиланган тартибда тиббий назорат ва ташхис ўтказиш учун 14 кунлик карантинда сақлаш мақсадида тайёрланаётган муассасада бўлиб, бу ерда яратилаётган шарт-шароитлар билан танишди. Масъулларга зарурий кўрсатмалар берилди, дейилади хабарда.
Маълумот учун, 17 март куни Ўзбекистонда коронавирус инфекциясига чалинган беморлар сони 11 нафарга етди.
Ўзбекистонда коронавирус инфекциясига чалиниш билан боғлиқ илк ҳолат 15 март, якшанба куни, соат 06:00 да тасдиқланган эди. Биринчи бемор 11 март куни Франциядан қайтган аёл бўлди. Кейинчалик унинг ўғли, қизи, турмуш ўртоғи, невараси ва яна бир қариндошида ҳам коронавирус инфекцияси аниқлангани маълум қилинди.
Бундан ташқари, 15 март куни тонгда Истанбулдан учиб келган ўзбекистонлик эркакда, шунингдек, 14 март куни тонгда Лондондан учиб келган Ўзбекистон фуқаросида ҳам коронавирус аниқланган. Соғлиқни сақлаш вазирининг маълум қилишича, 16 март ҳолати бўйича 5,6 мингдан ортиқ одам карантинга олинган.
Изоҳ (0)