Ҳукуматнинг «Тошкент шаҳар йўловчи транспорти тизимини такомиллаштириш чора-тадбирлари тўғрисида»ги қарори қабул қилинди. Унда пойтахт аҳолиси ва меҳмонларга транспортда сифатли хизматлар кўрсатиш, йўловчи транспорти тизимини интеграциялаш мақсадида олиб бориладиган чоралар баён этилган.
Метробус
Унга кўра, Тошкентда метробуслар йўлга қўйилади. Тажриба сифатида Истиқлол ва Фарғона йўли кўчаси бўйлаб Амир Темур хиёбонидан Compass савдо-кўнгилочар марказига қадар йўналиш белгиланган. 2020 йил 1 ноябргача ушбу йўналиш бўйлаб махсус қатнов йўлагини яратиш ва 20 та замонавий электробус харид қилиб, қувватлаш ускуналари билан таъминлаш лозим. Агар тажриба лойиҳаси муваффақиятли ўтса, метробуслар шаҳарнинг бошқа йўлларида ҳам ташкил этилади.
Технологиялар
Йўлкира ҳақини NFC (Near-Fiel Communication) технологияси ёрдамида нафақат Humo карталари, балки Uzcard NFC орқали ҳам тўлаш имконияти яратилади. Уни 2020 йилнинг 1 май санасигача амалга ошириш режалаштирилган. Шунингдек, йўлкирани NFC ёки QR орқали телефон ёрдамида тўлаш имконияти ҳам жорий этилади.
Транспорт тўлови тизимига халқаро тўлов тизимлари банк карталарини жалб этиш кўзда тутилган. 2020 йилнинг июнига қадар 15 та автоматлаштирилган транспорт карталарини сотиш шохобчаларини ўрнатиш, «ақлли соатлар», брелоклар ва браслетлар орқали йўлкира ҳақини тўлаш имконияти яратилади.
Октябрь ойида аҳолига жамоат транспортида юришни режалаштириш ва унинг иши тўғрисида бошқа фойдали маълумотларни олиш имконини берувчи «Яндекс.Транспорт»га ўхшаш «Менинг йўналишим» электрон тизимини жорий этиш режалаштирилган.
Декабрь ойига қадар автобуслар салонида бекатлар ҳақида маълумот берувчи автоматлаштирилган тизим жорий этилади. Оралиқ бекатларда эса автобусларнинг ҳаракатланиш жадвали ва бекатга етиб келиш вақтини кўрсатувчи электрон таблолар ўрнатилади.
Янги поездлар
2020—2023 йилларнинг ҳар бирида 10 тадан, 2024 йилда эса 8 та янги метро таркиблари сотиб олинади.
Автобус ва йўналишли таксилардаги ўзгаришлар
Метрополитеннинг Ерусти ҳалқа йўли (Қўйлиқ), Юнусобод ва Сергели йўналишилари қуриб битказилаётгани сабабли улар ҳаракатини такрорловчи автобус ва йўналишли таксилар йўналишлари тармоғи қайта кўриб чиқилади. Уларнинг айримлари оптималлаштирилса, айримлари олиб ташланади. Уларнинг тўлиқ рўйхати билан қарорда батафсил танишиш мумкин.
Изоҳ (0)