Maktab, akademik litseylar va kasb-hunar kolleji o‘quvchilari o‘rtasida 5 ta fandan onlayn olimpiadalar tashkil etiladi

24-martidan boshlab 4—11-sinf, akademik litseylar va kasb-hunar kollejlari o‘quvchilari o‘rtasida matematika, fizika, kimyo, biologiya hamda informatika va axborot texnologiyalari fanlaridan onlayn olimpiadalar tashkil etilishi rejalashtirilmoqda. Bu haqda Xalq ta’limi vazirligi matbuot xizmati “Daryo”ga ma’lum qildi.

Vazirlik bergan ma’lumotga ko‘ra, o‘quvchilar olimpiadada bepul va ixtiyoriy ravishda ishtirok etishi mumkin. Buning uchun ishtirokchilar “Olympiad.uzedu.uz” sayti orqali onlayn ro‘yxatdan o‘tishi va tahsil olayotgan ta’lim muassasasi rahbariyati tomonidan tasdiqlanishi kerak bo‘ladi.

Onlayn olimpiadalarni fanlar bo‘yicha o‘tkazish jadvali “Olympiad.uzedu.uz” veb-saytida e’lon qilib boriladi.

Bundan ko‘zlangan asosiy maqsad o‘quvchilarning bilim olishga bo‘lgan qiziqishini oshirish, ularning ijodiy faolligini qo‘llab-quvvatlash, ta’til davrida fanlarga oid qo‘shimcha materiallar bilan ta’minlab borish, egallagan bilimlarini baholash, natijalarni onlayn monitoring qilishdan iborat.

Onlayn olimpiada topshiriqlari murakkablik darajasi turlicha bo‘lgan 20 ta test savolidan iborat bo‘lib, topshiriqlarni bajarish uchun o‘quvchilarga bir soat vaqt ajratiladi.

Xalq ta’limi vazirligi ota-onalardan farzandlarining ta’til paytida dam olishlari va vaqtlarini samarali o‘tkazishlarini, darslarini o‘z vaqtida qilishlarini nazoratga olishlarini so‘raydi.