O‘zbekiston musulmonlari idorasi musulmonlarning diniy mazmundagi savollariga tez va qulay ravishda javob olishini ta’minlash maqsadida interaktiv va innovatsion xizmatlarni o‘z ichiga olgan “www.fatvo.uz” saytini ishga tushirdi. Bu haqda idora tomonidan ma’lum qilindi.
Qayd etilishicha, mazkur sayt diniy savol-javob yo‘nalishida eng zamonaviy xizmatlarni o‘zida mujassam etgani bilan alohida ahamiyatga ega.
Idora tomonidan ma’lum qilinishicha, ushbu saytdan foydalanuvchilar shar’iy masalalarga oid o‘z savollarini saytning “Savol yuborish” bo‘limi orqali yo‘llashi mumkin. Savol matniga audio, video va suratlarni ilova sifatida taqdim etish imkoniyati ham taqdim etilgan. Berilgan savollarga fatvo sohasida yetarli bilim, tajriba va yuqori malakaga ega bo‘lgan mutaxassislar tomonidan batafsil javoblar qaytariladi.
Saytda “Aqida”, “Poklik”, “Namoz”, “Ro‘za”, “Haj va Umra”, “Nikoh”, “Taloq”, “Savdo va tijorat”, “Qasam va nazr”, “Ijara”, “Halol-harom”, “Ruhiy tarbiya” va shu kabi dolzarb ruknlar ostida javoblar e’lon qilib boriladi. Kutubxona bo‘limida diniy mazmundagi kitob va risolalar joylab boriladi. Media qismida ulamolarning diniy savollarga bergan video va audio javoblari joylashtirilgan.
Foydalanuvchilar “Izlash” tugmasi orqali o‘zlari uchun zarur bo‘lgan mavzulardagi mavjud shar’iy savol-javoblarni topib, mutolaa qilishi mumkin.
Ta’kidlanishicha, 2020-yil 10-mart kunidan e’tiboran mazkur sayt test rejimida o‘z ish faoliyatini boshladi. Kelgusida ushbu saytni fatvo va shar’iy masalalar yo‘nalishida qomusiy manbaga aylantirish rejalashtirilmoqda.
Izoh (0)