Ўзбекистон мусулмонлари идораси мусулмонларнинг диний мазмундаги саволларига тез ва қулай равишда жавоб олишини таъминлаш мақсадида интерактив ва инновацион хизматларни ўз ичига олган «www.fatvo.uz» сайтини ишга туширди. Бу ҳақда идора томонидан маълум қилинди.
Қайд этилишича, мазкур сайт диний савол-жавоб йўналишида энг замонавий хизматларни ўзида мужассам этгани билан алоҳида аҳамиятга эга.
Идора томонидан маълум қилинишича, ушбу сайтдан фойдаланувчилар шаръий масалаларга оид ўз саволларини сайтнинг «Савол юбориш» бўлими орқали йўллаши мумкин. Савол матнига аудио, видео ва суратларни илова сифатида тақдим этиш имконияти ҳам тақдим этилган. Берилган саволларга фатво соҳасида етарли билим, тажриба ва юқори малакага эга бўлган мутахассислар томонидан батафсил жавоблар қайтарилади.
Сайтда «Ақида», «Поклик», «Намоз», «Рўза», «Ҳаж ва Умра», «Никоҳ», «Талоқ», «Савдо ва тижорат», «Қасам ва назр», «Ижара», «Ҳалол-ҳаром», «Руҳий тарбия» ва шу каби долзарб рукнлар остида жавоблар эълон қилиб борилади. Кутубхона бўлимида диний мазмундаги китоб ва рисолалар жойлаб борилади. Медиа қисмида уламоларнинг диний саволларга берган видео ва аудио жавоблари жойлаштирилган.
Фойдаланувчилар «Излаш» тугмаси орқали ўзлари учун зарур бўлган мавзулардаги мавжуд шаръий савол-жавобларни топиб, мутолаа қилиши мумкин.
Таъкидланишича, 2020 йил 10 март кунидан эътиборан мазкур сайт тест режимида ўз иш фаолиятини бошлади. Келгусида ушбу сайтни фатво ва шаръий масалалар йўналишида қомусий манбага айлантириш режалаштирилмоқда.
Изоҳ (0)