Ўзбекистон Президенти Шавкат Мирзиёев Хоразм вилоятига ташрифи доирасида Хива шаҳридаги Ичанқалъа мажмуасига ташриф буюриб, Амир Тўра мадрасасида амалга оширилган реставрация ишлари билан танишди. Бу ҳақда Президент матбуот хизмати хабар берди.
Қайд этилишича, Ичанқалъадаги 58 та тарихий-маданий мерос объектидан 17 тасида турли музейлар жойлашган. Қалъа UNESCO’нинг Жаҳон маданий мероси рўйхатига киритилган.
Бу ердаги тарихий обидаларни асраб-авайлаш мақсадида реставрация ва консервация ишлари олиб борилмоқда.
Таъкидланишича, Амир Тўра мадрасасининг қурилиши 1872 йилда бошланган. Бу ерда 54 та ҳужра бўлиб, ички саҳни кошин билан қопланган. Шунингдек, 2 та гумбазли хона, қишки ва ёзги масжидлар, дарсхона бўлган. Чор Россиясининг Хоразмга ҳужуми туфайли обида пештоқларини пардозлаш тўхтаб қолган. Мадраса Ичанқалъадаги туристик объектлардан бирига айланган.
Давлат раҳбари қадимий обидаларнинг ҳар бир ғишти тарихий эканини, ҳар бир нақшида маъно борлигини таъкидлади. Маданий меросни келажак авлодларга етказиш, бунинг учун реставрация мактабини ривожлантириш зарурлигини қайд этди.
Шу ерда Хоразм вилоятининг улкан туризм салоҳиятидан фойдаланиш бўйича лойиҳалар тақдимоти ўтказилди.
Маълум қилинишича, 2020—2021 йилларда вилоятда туризмни ривожлантириш дастури ишлаб чиқилган. Масалан, Хива туманида «Анор», «Анжир», Янгиариқ туманида «Меннонит қишлоғи» номли тематик парклар барпо этилиши режалаштирилган.
2019 йил декабрда Хоразм лазгиси UNESCO’нинг Номоддий маданий мерос рўйхатига киритилди. Хорижий давлатлар вакиллари ушбу миллий рақсни ўрганишга қизиқиш билдирмоқда. Шундан келиб чиқиб, вилоятда лазги академиясини ташкил этиш мўлжалланган.
Бугунги кунда вилоятда 600 дан ортиқ фермер хўжалиги балиқчилик билан шуғулланади. Улардан гастрономик туризм йўналишида фойдаланиш мақсадида 71 кўлда халқаро стандартлар даражасида хизмат кўрсатишни йўлга қўйиш кўзда тутилган.
Эслатиб ўтамиз, Шавкат Мирзиёев Хоразм вилоятига ташрифи доирасида «Ҳазорасп» эркин иқтисодий зонасига ташриф буюрди ҳамда у ердаги янги тўқимачилик корхонасини бориб кўрди. Шунингдек, Президент Янгиариқдаги йилига 5 миллион доллар даромад келтирадиган иссиқхона билан танишди.
Изоҳ (0)