Олий Мажлис Қонунчилик палатаси депутати, «Юксалиш« умуммиллий ҳаракати раисининг ўринбосари Бобур Бекмуродов коронавирус хавфининг ошиб бораётгани сабабли Ўзбекистондан тиббий ниқобларни экспорт қилишни тақиқлашни таклиф қилди.
«Ортиқча ваҳимага ҳожат йўқ, лекин янги коронавирус билан касалланиш ҳолатлари 70 дан зиёд давлатда тасдиқланди ва касалланганлар сони 100 мингга яқинлашиб қолди. Глобализация шароитида вирусдан изоляцияда қолиш имконияти мавжуд эмаслиги тобора ойдинлашиб бормоқда», — деб ёзади депутат.
Шунингдек, Бобур Бекмуродов фуқаролар хавфсизлигини таъминлаш мақсадида қуйидаги иккинчи босқич чораларни кўриш вақти келганини айтди:- Оммавий тадбирларни ўтказишни чеклаш, болалар ва ёшлар иштирокида оммавий тадбирларни тақиқлаш;
- транспорт қатновлари чекланган ёки йўловчиларини карантинга олиш назарда тутилган давлатлар рўйхатини кескин кенгайтириш;
- вирус билан курашишга кўмаклашувчи дорилар ва шахсий ҳимоя воситалари (ниқоблар, респираторлар) экспортини тақиқлаш ва зарур бўлса, хавфсиз давлатлардан импортини қўллаб-қувватлаш;
- фармацевтика бозорини қатъий назоратга олиш, вирусдан ҳимояланиш ва даволаш воситалари нархининг спекулятив ошишига йўл қўймаслик;
- янги коронавируснинг олдини олиш бўйича ташқи ишлар вазири, соғлиқни сақлаш вазири ва инвестиция вазирлари иштирокида Парламент эшитувини ўтказиш;
- боғча ва мактабларда касалланиш хавфини камайтиришга қаратилган чораларни кучайтириш.
Аввалроқ Россия тиббиёт ниқобларининг мамлакатдан олиб чиқиб кетилишига тақиқ қўйган эди.
Хитой Соғлиқни сақлаш миллий комиссияси мамлакатда 4 март ҳолатига кўра, янги турдаги COVID-19 коронавируси оқибатида 31 киши вафот этгани, ушбу касаллик билан вафот этганларнинг жами сони эса 3 мингдан ошиб кетгани ҳақида хабар берди. Вирус яна 139 кишида аниқланган.Даволанишга муваффақ бўлган беморлар сони 2189 нафарни ташкил қилмоқда, уларга шифохонадан жавоб берилган. Шундай қилиб, коронавирусдан даволанишга муваффақ бўлган беморларнинг жами сони 52 045 кишига етди. Мамлакат бўйлаб 669 мингдан ортиқ одам текширувлардан ўтказилган.
Ҳозирги вақтга келиб Хитой ҳудудида 80 409 киши касалликни ўзига юқтириб олган бўлиб, вафот этганлар сони Хитойда 3012 кишини ташкил этмоқда.
Изоҳ (0)