Ijtimoiy tarmoqlarda Jizzax viloyatining G‘allaorol tumani “Marjonbuloq” shaharcha fuqarolar yig‘inida istiqomat qiluvchi fuqaro nomidan tuman ma’muriy sudiga topshirilgan da’vo arizasining surati tarqaldi. Da’vo arizasi aynan qachon topshirilgani, ko‘rib chiqish uchun qabul qilingan-qilinmaganligi hozircha noma’lum.
Ariza muallifining bayon qilishicha, 2019-yil oxirida, Yangi yil bayrami arafasida qo‘shnisi chiqib, uyiga mehmon kelgani uchun aroq berib turishini so‘ragan, u qo‘shnisining iltimosini rad etmay, bir shisha aroq bergan.
“Lekin, buni qarangki, shu kunga qadar o‘rniga aroq bermayapti yoki pulini bermayapti. Portalga telefon qilsam, fuqarolik sudi Omonovga bor, dedi. Shuning uchun, Omonov, shu aroqning yoki pulini olib bering, deb ariza beryapman”, — deya arizasini izohlagan fuqaro.
Ariza muallifining alohida qayd etishicha, u qo‘shnisiga qarzga berilgan aroqni 18 ming so‘mga sotib olgan. Ta’kidlashicha, qo‘shnisiga “aroqni qaytar” desa, qo‘shnisi “nomardlik qilib”, “bermayman, sudga bor”, degan.
“Menikiga ham mehmon kelishi bor. Tunov kuni qudalarning oldiga qo‘yolmadim... Hurmatli sud, Omonov Sherzod aka, menga javobgardan bir dona aroqni yoki pulini undirib berishingizni so‘rayman”, — deyiladi arizada.
Izoh (0)