Ижтимоий тармоқларда Жиззах вилоятининг Ғаллаорол тумани «Маржонбулоқ» шаҳарча фуқаролар йиғинида истиқомат қилувчи фуқаро номидан туман маъмурий судига топширилган даъво аризасининг сурати тарқалди. Даъво аризаси айнан қачон топширилгани, кўриб чиқиш учун қабул қилинган-қилинмаганлиги ҳозирча номаълум.
Ариза муаллифининг баён қилишича, 2019 йил охирида, Янги йил байрами арафасида қўшниси чиқиб, уйига меҳмон келгани учун ароқ бериб туришини сўраган, у қўшнисининг илтимосини рад этмай, бир шиша ароқ берган.
«Лекин, буни қарангки, шу кунга қадар ўрнига ароқ бермаяпти ёки пулини бермаяпти. Порталга телефон қилсам, фуқаролик суди Омоновга бор, деди. Шунинг учун, Омонов, шу ароқнинг ёки пулини олиб беринг, деб ариза беряпман», — дея аризасини изоҳлаган фуқаро.
Ариза муаллифининг алоҳида қайд этишича, у қўшнисига қарзга берилган ароқни 18 минг сўмга сотиб олган. Таъкидлашича, қўшнисига «ароқни қайтар» деса, қўшниси «номардлик қилиб», «бермайман, судга бор», деган.
«Меникига ҳам меҳмон келиши бор. Тунов куни қудаларнинг олдига қўёлмадим... Ҳурматли суд, Омонов Шерзод ака, менга жавобгардан бир дона ароқни ёки пулини ундириб беришингизни сўрайман», — дейилади аризада.
Изоҳ (0)