O‘zbekistonda bakalavr va magistrlarni tayyorlashda mamlakatning tegishli oliy ta’lim muassasalarida “MICE turizm”, “Ekoturizm” fanlari joriy etilishi rejalashtirilmoqda.
Bu haqda “O‘zbekiston Respublikasida turizm xizmatlarini yanada diversifikatsiya qilish chora-tadbirlari to‘g‘risida”gi Prezident qarori loyihasida ko‘zda tutilgan.
Unga ko‘ra Oliy va o‘rta maxsus ta’lim vazirligi hamda Vazirlar Mahkamasi huzuridagi ta’lim sifatini nazorat qilish davlat inspeksiyasi bilan birgalikda 2020/2021-o‘quv yilidan boshlab bakalavr va magistrlarni tayyorlashda mamlakatning tegishli oliy ta’lim muassasalarida “MICE turizm”, “Ekoturizm” fanlarini joriy etishni ta’minlaydi.
Shuningdek, respublikada xorijiy oliy ta’lim muassasalarini, shu jumladan, turizm sohasida malakali kadrlar tayyorlashga ixtisoslashgan filiallarini ochish bo‘yicha Vazirlar Mahkamasiga takliflar kiritadi.
Quyidagilarni nazarda tutuvchi akademik immigratsiyani rag‘batlantirish mexanizmlarini ishlab chiqadi:
- chet ellik yuqori malakali ilmiy-pedagogik kadrlarni, shu jumladan, chet eldagi vatandoshlarni kasb-hunar va oliy o‘quv yurtlari, ilmiy-tadqiqot markazlari faoliyatiga jalb etish;
- soddalashtirilgan tartibda “akademik viza” turini chet ellik olimlarga, o‘qituvchilarga va ularning oila a’zolariga kontrakt muddati davomida uni respublikadan tashqariga chiqmasdan uzaytirish imkoniyati bilan 5 yil muddatga O‘zbekistonda yashash uchun ruxsatnoma berish.
Izoh (0)