Futbol bo‘yicha Myunxenning “Bavariya” klubi o‘yinchilariga koronavirus xavfi tufayli muxlislar bilan birga suratga tushish hamda dastxat ulashish ma’n etildi. Bu haqda klub matbuot xizmati xabar berdi.
Nemis futbol ligasi 26-fevral kuni koronavirus tarqalishi tufayli birinchi va ikkinchi Bundesligada amal qilinishi shart bo‘lgan ehtiyot choralari haqida ma’lum qildi.Ma’lumot uchun, avvalroq koronavirus sabab “Yuventus”—“Inter” va A Seriyaning yana to‘rtta o‘yini tomoshabinlarsiz o‘tishi ma’lum bo‘lgandi. Virus tufayli “Paxtakor”ning OChLdagi o‘yini qoldirildi.“Bavariya” Germaniya va dunyodagi bu boradagi vaziyatni diqqat bilan kuzatib bormoqda, klub tibbiy departamenti xodimlari muntazam ravishda Robert Kox nomidagi institut mutaxassislari bilan o‘zaro fikr almashib kelmoqda.
Mazkur institutning tavsiyalariga asoslanib “Bavariya” tibbiy departamenti rahbari professor Roland Shmidt futbolchilarga bundan keyin muxlislarga dastxat bermaslik va ular bilan suratga tushmaslikni tavsiya qildi.
Biz mashg‘ulotlar va uchrashuvlarga tashrif buyurayotgan muxlislardan ushbu holatni to‘g‘ri qabul qilishlarini iltimos qilib qolamiz.
“Bavariya” klubi bayonoti
Eslatib o‘tamiz, butun dunyo bo‘ylab koronavirus bilan zararlanishning 83 272 holati qayd etilib, buning natijasida 2858 nafar inson vafot etdi. Koronavirus 53 mamlakatga tarqaldi.
Izoh (0)