“Endi barcha gollarimni unga bag‘ishlayman” — “Manchester Yunayted” yangi hujumchisidan kichik hikoya

Manchesterga kelgan ilk kunlaridayoq Odion Igalo “Manchester Yunayted”ga o‘tishni butun umr orzu qilganini, biroq bu kunlarni uning katta opasi Meri ko‘rmaganidan qattiq afsusda ekanligini ta’kidladi.

Odionning opasi Meri 2019-yil dekabrida 43 yoshida vafot etdi. Nigeriyalik hujumchi kelajakda uradigan barcha gollarini o‘zi uchun onasidek bo‘lgan opasiga bag‘ishlashini aytdi.

“Hissiyotlar hali ham meni tark etgani yo‘q. Boisi opam meni bir umrga tark etganini hali ham tushunib yetmadim. Endi uni hech qachon ko‘rmayman.

Uyda yolg‘iz qolgan vaqtlarimda uni yodga olaman, yuragimda o‘zgacha og‘riq paydo bo‘ladi. Egizagim Axera qo‘ng‘iroq qilib, Meri unga yetishmayotganligini aytadi. Ba’zan yolg‘izlikda yig‘lab ham olaman. Bu o‘ta og‘ir yo‘qotish, biroq erkak kishi sifatida kuchli bo‘lib qolishga harakat qilaman.

Meri bolalarini maktabga tayyorlab turgan vaqtda to‘satdan yuragi xuruj berib qoladi. Bu juda og‘riqli holat edi. U hushidan ketib bo‘lgandi. Bolalar tez tibbiy yordamga qo‘ng‘iroq qilguniga qadar u hayotdan ko‘z yumdi. Shifokorlar kelib uni jonlantirishga harakat qilib ko‘rguncha u vafot etgandi.

Meri katta opamiz bo‘lishiga qaramay barchamiz uchun onamizdek edi. U “Yunayted”ning ashaddiy ishqibozi edi. Hammamiz “Manchester”ning o‘yinlarini ko‘rib katta bo‘ldik, unga muxlislik qildik.

Shu kundan e’tiboran faoliyatim yakuniga qadar uradigan barcha golimni Xudo va Meriga bag‘ishlayman. Uning ismini maxsus futbolkam va butsilarimga yozdim. Butun dunyoga u men bilan ekanligini ko‘rsatishni xohlayman. Meri hozir yonimizda bo‘lmasa ham bu orqali mening “Old Trafford”da qanday o‘ynayotganligimni, birgalikda qilgan orzularimizni his qiladi deb umid qilaman”, — deydi Igalo.