Toshkent davlat iqtisodiyot universitetida 26-fevral kuni Senatning Fan, ta’lim va sog‘liqni saqlash masalalari qo‘mitasi tomonidan “Oliy ta’lim sohasida korrupsiyaga qarshi kurashish tizimini yana-da takomillashtirish: muammo va ta’sirchan choralar” mavzusida davra suhbati o‘tkazildi.
Senat axborot xizmati xabariga ko‘ra, davra suhbatida oliy ta’lim muassasalarining jamiyat oldidagi hisobdorligi va ta’lim sifatini ta’minlashdagi mas’uliyatini oshirish, professor-o‘qituvchilar bilan talabalar o‘rtasidagi byurokratik unsurlarni bartaraf etish masalalari muhokama qilingan.
Ta’kidlanishicha, O‘zbekistonda so‘nggi ikki yilda tizimdagi 326 nafar xodim ta’lim jarayoni bilan bog‘liq jinoyatlari uchun javobgarlikka tortilgan — ularning uch nafari rektor, besh nafari prorektor, 15 nafari dekan va dekan o‘rinbosari hamda 62 nafari o‘qituvchidir.
2018-yil 1-sentabrdan boshlab O‘zbekistonda xorijiy o‘quv yurtlari bilan hamkorlikda talabalarni o‘qitish va ikki tomonlama tan olinadigan diplom berish amaliyoti joriy etilganligiga qaramay, bunda ham turli suiiste’molchiliklarga yo‘l qo‘yilayotganligi keskin tanqid qilindi.
Tadbir davomida talabani o‘qishga qabul qilishdan boshlab, to diplom olishga qadar bo‘lgan har bir bosqichda kuzatilayotgan korrupsiya holatlari muhokama qilindi.
“Davra suhbati doirasida oliy ta’lim sohasida ‘Korrupsiyasiz soha‘ loyihasini izchil davom ettirishga, korrupsiyaning har qanday ko‘rinishiga barham berishga qaratilgan taklif va tavsiyalar ishlab chiqildi”, — deyiladi Senat axborotida.
Izoh (0)