“Daryo”da “Qashqadaryolik beva ayolning uyi buzib tashlandi. Oila ko‘chada qoldi” sarlavhali maqola e’lon qilingandi. MIB Qashqadaryo viloyat boshqarmasi mazkur maqolaga munosabat bildirdi.
Qashqadaryo viloyat boshqarmasining xabar berishicha, Fuqarolik ishlari bo‘yicha Chiroqchi tuman sudining 2017-yil 6-iyun kunidagi ijro varaqasiga asosan da’vogar Chiroqchi tuman hokimligi foydasiga fuqaro S.Bobonova tomonidan Chiroqchi tuman “Dam” mahalla fuqarolar yig‘ini Dam qishlog‘i hududida 12x4 kvadrat metr o‘lchamdagi noqonuniy qurilgan uy-joyni fuqaroning hisobidan majburiy buzdirish belgilangan. Ijro varaqasi byuroning Chiroqchi tuman bo‘limiga 2017-yil 10-avgust kuni kelib tushgan. Biroq tuman hokimligi huquqshunosi X.Bo‘ronovning 2019-yil 14 -martdagi xatiga asosan ijrosiz qaytarilgan.
Tuman hokimligi tomonidan ijro varaqasi MIB tuman bo‘limiga 2019-yil 25-may kuni ijro uchun qayta topshirilgan. Qarzdor S.Bobonova bir necha marta yozma va og‘zaki ogohlantirilib, imkoniyat berilishiga qaramasdan ixtiyoriy buzib olish chorasini ko‘rmaganligi sababli ijro harakatlari bir necha marta kechiktirilgan.
2020-yil 5-fevral kuni yana ijro harakatlari tayinlangan. Ijro harakatlari tayinlanishiga da’vogar taraf — tuman hokimining o‘rinbosarlari O‘.Abdurahimov, E.Boboqulovlar tashabbuskor bo‘lgan. Tuman hokimiligi vakili ijro harakatlarida ishtirok etgan va rasmiylashtirilgan hujjatlarga imzo qo‘ygan. Ijrochiga uyni buzish uchun texnika vositasi ham tuman hokimligi tomonidan berilgan. Tuman hokimligiga S.Bobonovaning qo‘shnisi O.Xurramova uning noqonuniy qurishidan norozi bo‘lib, bir necha marta og‘zaki shikoyat qilavergach, tuman hokimligi uyni buzib shikoyatchining murojaatini qanoatlantirmoqchi bo‘lgan.
Avvalroq “Daryo” muxbiri bilan suhbatlashgan hokim o‘rinbosari O‘ktam Abdurahimov hokimlik uyni buzish harakatlarini to‘xtatishga uringanini ta’kidlagandi.
“Vakolatimizga kirmasa-da, fuqaro haqida qayg‘urganimiz uchun ham 2018-yil may oyida MIB fuqaroning uyini majburiy tartibda buzish uchun borganida MIB rahbariyatiga iltimos qilib, ijroni ma’lum muddatga to‘xtatdik”, — degandi Chiroqchi tuman hokimi o‘rinbosari O‘ktam Abdurahimov.
Mahalla raisi Yorqul Bekmurodov ham fuqaro uyi buzilgach voqea joyiga kelgan tuman hokimi Xurram Jo‘rayev uni uyni buzish ishlariga to‘sqinlik qilolmagani uchun koyiganini aytgandi. MIB xodimi Nurbek Xidirov esa uyni buzish tuman hokimning topshirig‘i asosida bajarilganini ta’kidlagandi.
Izoh (0)