Тошкент давлат иқтисодиёт университетида 26 февраль куни Сенатнинг Фан, таълим ва соғлиқни сақлаш масалалари қўмитаси томонидан «Олий таълим соҳасида коррупцияга қарши курашиш тизимини яна-да такомиллаштириш: муаммо ва таъсирчан чоралар» мавзусида давра суҳбати ўтказилди.
Сенат ахборот хизмати хабарига кўра, давра суҳбатида олий таълим муассасаларининг жамият олдидаги ҳисобдорлиги ва таълим сифатини таъминлашдаги масъулиятини ошириш, профессор-ўқитувчилар билан талабалар ўртасидаги бюрократик унсурларни бартараф этиш масалалари муҳокама қилинган.
Таъкидланишича, Ўзбекистонда сўнгги икки йилда тизимдаги 326 нафар ходим таълим жараёни билан боғлиқ жиноятлари учун жавобгарликка тортилган — уларнинг уч нафари ректор, беш нафари проректор, 15 нафари декан ва декан ўринбосари ҳамда 62 нафари ўқитувчидир.
2018 йил 1 сентябрдан бошлаб Ўзбекистонда хорижий ўқув юртлари билан ҳамкорликда талабаларни ўқитиш ва икки томонлама тан олинадиган диплом бериш амалиёти жорий этилганлигига қарамай, бунда ҳам турли суиистеъмолчиликларга йўл қўйилаётганлиги кескин танқид қилинди.
Тадбир давомида талабани ўқишга қабул қилишдан бошлаб, то диплом олишга қадар бўлган ҳар бир босқичда кузатилаётган коррупция ҳолатлари муҳокама қилинди.
«Давра суҳбати доирасида олий таълим соҳасида ‘Коррупциясиз соҳа‘ лойиҳасини изчил давом эттиришга, коррупциянинг ҳар қандай кўринишига барҳам беришга қаратилган таклиф ва тавсиялар ишлаб чиқилди», — дейилади Сенат ахборотида.
Изоҳ (0)