Moskvadagi metro bekati oldida bolasini tashlab ketgan o‘zbekistonlik ayol uni bolalar uyiga joylashtirmoqchi bo‘lgani aniqlandi

O‘zbekistonlik ayol Moskvadagi metro bekati yonida o‘zining ikki oylik bolasini tashlab ketgani haqida xabar berilgan edi.

RT’ning yozishicha, ikki oylik bolasini Moskvadagi metro bekati oldida qoldirib ketgan o‘zbekistonlik ayol bunga qadar o‘g‘lini bolalar uyiga joylashtirishga uringan. Ayolning advokati Aleksandr Timoshenkoning aytishicha, moddiy jihatdan bolani ta’minlay olmasligi sababli ayol shunday qarorga kelgan.

Advokatning so‘zlariga ko‘ra, uning mijozi Maftuna Karimova zolim otasidan qochib, Moskvaga kelgan va u yerda homilador bo‘lib qolgan, shundan keyin bolaning otasi uni tashlab ketgan. Ayol farzandini muddatidan oldin dunyoga keltirgan. Shundan keyin u darhol ish qidirishga tushgan.

Qayd etilishicha, o‘zbekistonlik ayol hamma pulni o‘g‘li uchun yotoq, ovqat va dori-darmonga sarflagan. Advokatning ma’lum qilishicha, Maftuna Karimova qo‘lidagi bolasi bilan qurilishda, baliq do‘konida va do‘konda ishlagan.

Advokatning ta’kidlashicha, dastlab Karimova o‘g‘li tug‘ilgan kasalxonadan yordam so‘rab murojaat qilgan. Shifokorlar orqali u bolani bolalar uyiga yubormoqchi bo‘lgan. Biroq ayol bunga muvaffaq bo‘lmagan.

Qayd etilishicha, chaqaloq doimo ochlikdan yig‘lagan. Shundan so‘ng, ayol do‘stidan uni Moskvaga olib borishni so‘ragan. U metroda, odamlar ko‘p joyda bolasini tashlab ketishga qaror qilgan.

Ayol kuzatuv kameralarida qayd etilgan. Ko‘p o‘tmay ayol shahar atrofida qo‘lga olingan. Ushbu holat bo‘yicha jinoiy ish qo‘zg‘atilgan. Maftuna Karimova 12-aprelgacha hibsda saqlanadi.

Eslatib o‘tamiz, 10-fevral, dushanba kuni, Toshkent shahar Chilonzor tumanidagi “Sovplastital” korxonasi binosi orqasida, Bunyodkor ko‘chasi bo‘ylab oqib o‘tadigan kanaldan beliga tosh boylab tashlab ketilgan chaqaloq topilgan edi.