Professional boksning ikkinchi yarim yengil vazn (-55, 34 kg) toifasida IBF va WBA kamarlarini qo‘lga kiritgan Murodjon Ahmadaliyev 8-fevral, shanba kuni, Namanganga keldi. Bu haqda “Daryo” muxbiri Azizbek Abduvaliyev xabar bermoqda.
Qamchiq dovonidagi viloyat chegarasida chempionni yaqinlari, viloyat hokimligi, jamoatchilik va OAV vakillari, sport muxlislari kutib oldi.
Murodjon Ahmadaliyev yo‘l-yo‘lakay Pop va Chustda bo‘ldi. Xususan, o‘zi tug‘ilib o‘sgan Chust tumanida minglab muxlislar qurshovida qoldi.
Yo‘l bo‘ylari va bog‘ni to‘ldirgan hamyurtlari uni olqishlar bilan qarshi oldi.
Viloyat hokimi Xayrullo Bozorov sportchini g‘alaba bilan qutlab, qolgan ikki versiyada ham chempionlik kamarlarini qo‘lga kiritishiga umid bildirdi.
Namangan shahridagi viloyat Madaniyat markazida Murodjon Ahmadaliyevning viloyat yoshlari hamda boks ixlosmandlari bilan uchrashuvi bo‘lib o‘tdi.
Uchrashuvda chempionga to‘n kiydirilib, viloyat hokimligi sovg‘asi — Damas avtomobili taqdim etildi.
Murodjon sahnadan pastga tushib, mashina kalitini qarsaklar ostida ota-onasiga topshirdi.
Eslatib o‘tamiz, avvalroq Ahmadaliyevga Prezident sovg‘asi sifatida Chevrolet Tracker avtomobili hamda Toshkent shahridan uch xonali uy sovg‘a qilingan edi.
Uchrashuv yoshlarning Murodjon Ahmadaliyevga turli mavzulardagi savollari bilan davom etdi.
Muloqot davomida qiziq holat yuz berdi: chempionning to‘liq adashi bo‘lgan sportchi Murodjon Ahmadaliyev so‘z olib, ijtimoiy tarmoqlar orqali nomiga kelayotgan ko‘plab tabriklarni egasiga yetkazdi.
P.S. Mazkur uchrashuvda ishtirok etgan “Daryo” muxbirining chempion bilan tushgan surati BBC’ning Instagram’dagi sahifasida e’lon qilindi va hozirgacha 1,7 mingdan ortiq “layk” to‘plashga ulgurdi.
Izoh (0)