Shahar markazidan uy, Malibu, Tracker, Gentra, Nexia-3 va eng kamida 3 ming dollar. O‘zbekistonlik bokschilar so‘nggi 4 yilda nimalar bilan taqdirlandi?

Professional boksning ikkinchi yarim yengil (-55, 34 kg) vazn toifasida WBA va IBF kamarlarini qo‘lga kiritigan Murodjon Ahmadaliyevga Prezident sovg‘asi sifatida Chevrolet Tracker hamda Toshkent shahridan uch xonali uy sovg‘a qilindi.

So‘nggi 4 yillikda bokschilarga mashina yoki uy sovg‘a qilinishi yangilik emas. Biz esa 2016-yildan beri o‘zbekistonlik bokschilar erishgan yutuqlari uchun qanday sovg‘a va mukofotlar bilan taqdirlanganini bir sahifaga jamlashga harakat qildik.

Braziliya mezbonlik qilgan XXXI yozgi Olimpiada o‘yinlarida o‘zbekistonlik 7 nafar bokschi sovrindorga aylandi. Hasanboy Do‘stmatov, Shahobiddin Zoirov, Fazliddin G‘oibnazarov oltin medalga ega chiqqan bo‘lsa, Shahram G‘iyosov hamda Bektemir Meliqo‘ziyev o‘z vazn toifalarida kumush medalni qo‘lga kiritdi. Rustam To‘laganov va Murodjon Ahmadaliyev esa O‘zbekiston nomiga bronza medallarni yozib qo‘ydi. Musobaqadan avval va’da qilingandek, oltin 200 ming, kumush 100 ming, bronza medal sohiblari esa 75 ming AQSh dollari mukofot puliga ega bo‘ldi. Bundan tashqari har bir sovrindor sportchiga Chevrolet Malibu avtomobili topshirildi.

Riodan qaytgan sportchilarni viloyat hokimliklari ham taqdirlashni kanda qilmadi. Xususan, Murodjon Ahmadaliyevga Namangan shahridan ikki xonali uy sovg‘a qilindi. Qayd etish joiz, Murodjon 2015-yil Qatar poytaxti Doha shahrida bo‘lib o‘tgan Jahon Chempionatida kumush medal bilan taqdirlangan va Olimpiada yo‘llanmasini qo‘lga kiritgani uchun hokimlik unga Chevrolet Cobalt hadya qilgandi.

Oradan bir yil o‘tib, Germaniyaning Gamburg shahri boks bo‘yicha navbatdagi Jahon Chempionatiga mezbonlik qildi. Unda O‘zbekiston terma jamoasi umumjamoa hisobida Kubadan so‘ng ikkinchi o‘rinni qo‘lga kiritdi. Terma jamoa hisobiga yagona oltinni esa Shahram G‘iyosov keltirdi. Sportchi Buxoroga qaytishi bilan viloyat hokimligi uni va murabbiyi Ravshan Xo‘jayevni Chevrolet Gentra avtomobillari bilan mukofotladi.

2018-yili Indoneziya mezbonligida o‘tgan yozgi Osiyo o‘yinlarida o‘zbekistonlik bokschilar 7 ta medalni qo‘lga kiritdi. Jasurbek Latipov, Mirazizbek Mirzahalilov, Iqboljon Xoldorov, Bobousmon Boturov, Isroil Madrimov oltin medalga ega chiqdi. Hasanboy Do‘stmatov hamda Shunqor Abdurasulov esa kumush medalni qo‘lga kiritdi. Va’daga ko‘ra, oltin medalchilar 5000 ming dollar, kumush medal sohiblari esa 3000 ming dollarli bo‘ldi.

2019-yil aprelida Tailandda navbatdagi Osiyo chempionati o‘tkazildi. Unda oltin medalga ega chiqqan Bahodir Jalolovga Surxondaryo viloyati hokimligi tomonidan Termiz shahridan 2 xonali uy sovg‘a qilindi.

2019-yil sentabrida esa Rossiyaning Yekaterinburg shahri boks bo‘yicha navbatdagi Jahon chempionati bo‘lib o‘tdi. Unda O‘zbekiston terma jamoasi sportchilari umumjamoa hisobida 3 ta oltin, 1 ta kumush va 1 ta bronza medali bilan musobaqani 1-o‘rinda yakunladi. Oltin medalga ega chiqqan Bahodir Jalolov, Shahobiddin Zoirov, Mirazizbek Mirzahalilovlar Prezident sovg‘asi sifatida siz-u bizga yaxshi tanish Chevrolet Tracker sovg‘a qilindi. Kumushchi Dilshodbek Ro‘zmetovga Gentra, bronzachi Bobousmon Boturovga esa Nexia-3 nasib etdi.

Ta’kidlash joiz, Buxoro viloyati hokimligi ham taqdirlash marosimidan oldinroq oltin medal sohibi Shahobiddin Zoirov va uning murabbiyiga bittadan Chevrolet Tracker’ni tortiq qilishga ulgurgandi.

Tracker’dan hech qancha o‘tmay, musobaqaning eng yaxshi bokschisi sifatida e’tirof etilgan Bahodir Jalolovga Toshkent shahridan uy sovg‘a qilindi.

Biroz vaqt o‘tib esa Farg‘ona viloyati hokimligi Mirazizbek Mirzahalilovga shahar markazidan uy sovg‘a qildi.

Ma’lumot uchun, 2020-yil Yaponiyaning Tokio shahri navbatdagi yozgi Olimpiada o‘yinlariga mezbonlik qiladi. Unga yo‘llanmani qo‘lga kiritgan o‘zbekistonlik sportchilarga 100 million so‘m mukofot puli va’da qilingan. Eslatib o‘tish o‘rinli, Rio—2016 Olimpiadasi yo‘llanmasi uchun 50 million so‘m mukofot puli belgilangandi.

O‘zbekistonlik bokschilar 3—11-mart kunlari Iordaniyaning Amman shahrida Tokio Olimpiadasi yo‘llanamasi uchun kurash olib boradi.