Профессионал бокснинг иккинчи ярим енгил вазн (-55, 34 кг) тоифасида IBF ва WBA камарларини қўлга киритган Муроджон Аҳмадалиев 8 февраль, шанба куни, Наманганга келди. Бу ҳақда «Дарё» мухбири Азизбек Абдувалиев хабар бермоқда.
Қамчиқ довонидаги вилоят чегарасида чемпионни яқинлари, вилоят ҳокимлиги, жамоатчилик ва ОАВ вакиллари, спорт мухлислари кутиб олди.
Муроджон Аҳмадалиев йўл-йўлакай Поп ва Чустда бўлди. Хусусан, ўзи туғилиб ўсган Чуст туманида минглаб мухлислар қуршовида қолди.
Йўл бўйлари ва боғни тўлдирган ҳамюртлари уни олқишлар билан қарши олди.
Вилоят ҳокими Хайрулло Бозоров спортчини ғалаба билан қутлаб, қолган икки версияда ҳам чемпионлик камарларини қўлга киритишига умид билдирди.
Наманган шаҳридаги вилоят Маданият марказида Муроджон Аҳмадалиевнинг вилоят ёшлари ҳамда бокс ихлосмандлари билан учрашуви бўлиб ўтди.
Учрашувда чемпионга тўн кийдирилиб, вилоят ҳокимлиги совғаси — Damas автомобили тақдим этилди.
Муроджон саҳнадан пастга тушиб, машина калитини қарсаклар остида ота-онасига топширди.
Эслатиб ўтамиз, аввалроқ Аҳмадалиевга Президент совғаси сифатида Chevrolet Tracker автомобили ҳамда Тошкент шаҳридан уч хонали уй совға қилинган эди.
Учрашув ёшларнинг Муроджон Аҳмадалиевга турли мавзулардаги саволлари билан давом этди.
Мулоқот давомида қизиқ ҳолат юз берди: чемпионнинг тўлиқ адаши бўлган спортчи Муроджон Аҳмадалиев сўз олиб, ижтимоий тармоқлар орқали номига келаётган кўплаб табрикларни эгасига етказди.
P.S. Мазкур учрашувда иштирок этган «Дарё» мухбирининг чемпион билан тушган сурати BBC’нинг Instagram’даги саҳифасида эълон қилинди ва ҳозиргача 1,7 мингдан ортиқ «лайк» тўплашга улгурди.
Изоҳ (0)