Qashqadaryo viloyati G‘uzor tuman hokimligi tashabbusi bilan Rossiyaga bodring eksporti yo‘lga qo‘yildi. Dastlabki hosil joriy yil mart oyida Rossiyaga yetkaziladi, deya xabar beradi “Daryo” muxbiri.
Ta’kidlanishicha, Prezident Shavkat Mirziyoyevning 2018-yil 13, 14-dekabr kunlari Qashqadaryo viloyatiga tashrifi chog‘ida G‘uzor tumanidan Rossiya Federatsiyasiga bodring eksport qilish haqida topshiriq berilgan.
— Prezidentimizning viloyatimizga tashrifi chog‘ida o‘tkazilgan majlis bayoniga ko‘ra, tumanimizda faoliyat yuritayotgan “Fayzullayev Muhiddin” MChJ tomonidan 2 gektar yer maydonida gidroponika usulida issiqxona tashkil etish loyihasi rejalashtirilgandi, — deydi G‘uzor tuman hokimligi axborot xizmati rahbari Xudoyberdi Yo‘ldoshev. — Hozirgi kunda “Fayzullayev Muhiddin” MChJ tomonidan 2 gektar yer maydonida gidroponika usulida issiqxona loyihasini amalga oshirish uchun jami 18 milliard 260 million so‘m sarflandi. Shundan 9 milliard 130 million so‘m o‘z mablag‘i, 1 million 100 ming AQSh dollari miqdorida tijorat bank krediti hisobiga amalga oshirilib, 38 ta yangi ish o‘rini yaratildi.
Ma’lum bo‘lishicha, 200 ming dollarlik dastlabki hosil joriy yilning mart oyida Rossiyaga yetkaziladi.
— Issiqxonamizda bir mavsumda 450 tonna eksportbop mahsulot yetishtirilmoqda, — deydi 28 yoshli tadbirkor Muhiddin Fayzullayev. — Rejamizga ko‘ra, bir yilda bir million dollarlik mahsulot eksport qilamiz.
G‘uzor tuman hokimligi axborot xizmatining qo‘shimcha qilishicha, tumanda davlat ulushi ishtirokisiz tadbirkor tashabbusi bilan Rossiya hamda Ozarbayjon davlatlari hamkorligida dastlabki qo‘shma korxona ham ish boshlagan.
— Mazkur qo‘shma korxona gazoblok ishlab chiqaradi, ko‘prik va inshootlar qurish bilan shug‘ullanadi, — deydi tuman hokimligi axborot xizmati rahbari Xudoyberdi Yo‘ldoshev.
Izoh (0)