Ichki ishlar vazirligi Yo‘l harakati xavfsizligi bosh boshqarmasi o‘zining yangi “Multimedia markazi”ga ega bo‘ldi. Bu haqda “Daryo” muxbiri xabar bermoqda.
Markazning ochilish marosimida Ichki ishlar vaziri o‘rinbosari Azizbek Ikramov, Respublika Yo‘l harakati xavfsizligi bosh boshqarmasi boshlig‘i Olim Saidov hamda tizimda uzoq yillar mehnat qilgan faxriy xodimlar ishtirok etdi.
Azizbek Ikramov mazkur markaz ochilishidan ko‘zlangan maqsadga izoh berar ekan, “OAV bilan muntazam muloqot o‘tkazish maqsadida, yangi innovatsion g‘oyalar bilan tashkil qilganmiz bu markazni. Biz endi sizlar bilan ko‘prik quramiz, devorlarni hammasini buzamiz. Endi doim shunday bo‘ladi”, — dedi.
Multimedia markazi tashkil etilishi orqali Yo‘l harakati xavfsizligi xizmati tizimidagi islohotlarni OAVda professional tarzda yoritishni ta’minlash ko‘zda tutilgan.
Markaz zamonaviy texnologiyalar va kreativ yondashuvlardan foydalangan holda axborot-tahliliy media materiallarni tayyorlashga ixtisoslashgan. Bu yerda audio va videoroliklar, teleko‘rsatuv va radio eshittirishlar, ijtimoiy reklamalar, voqea joyidan reportajlar tayyorlanib, efirga, internet tarmog‘iga uzatiladi.
Har bir media materialning dolzarbligi, huquqiy jarayonlar va davr talabiga mosligi hamda yuqori saviyada bo‘lishi talabi qo‘yilgan.
Markaz faoliyati negizida OAV va ijtimoiy tarmoqlarda yo‘l harakati xavfsizligi tizimiga oid e’lon qilinayotgan axborotlar tahliliga asosan, noto‘g‘ri, asoslanmagan ma’lumotlarga o‘z vaqtida javob berish ham ko‘zda tutiladi. Jarayonda mavjud holat tahliliy o‘rganilib, shu asosda rasmiy ma’lumot beriladi.
Yangi markaz rahbariyat, texnika va jihozlar, axborot xizmati xodimlari, ovoz yozish studiyasi, tasvirga olish va uzatish studiyasi, internet saytlari bilan ishlash, majlislar zali, tizimda xizmat qilgan faxriylar bilan uchrashish, jamoatchilik kengashi kabi bir necha xonalardan tarkib topgan.