Internet foydalanuvchilari shampun tarkibidagi gidantoin moddasi saratonni keltirib chiqarishi mumkinligini taxmin qilmoqda. Haqiqatdan ham shundaymi? Ushbu savolga trixolog-shifokor javob beradi.
Gidantoin nima?
“DMDM Hydantoin — bakteriya va zamburug‘lar o‘sishiga qarshi samarali konservant. Kosmetik mahsulotning suvli fazasida komponent gidrolizlanadi va erkin formaldegidni chiqaradi. DMDM Hydantoin konservantining dozasi kichik (AQSHda — 1 foizgacha, Yevropada — 0,6 foizgacha) bo‘lib, shampun tarkibida formaldegid darajasi qatʼiy cheklangan (0,2 foizgacha)”, dedi sochlar salomatligi bo‘yicha mutaxassis Asya Zubkova.
Ekspertning qo‘shimcha qilishicha, konservant mahsulotni mikrobial ifloslanishdan himoya qiladi. U inson organizmida oz miqdorda ishlab chiqariladi, qonda, mevalarda va baʼzi oziq-ovqatlarda ham mavjud. Shuning uchun agar sizda ularga sezuvchanlik bo‘lmasa, bunday konservantlardan qo‘rqishning hojati yo‘q.
Shampun tarkibiga nimalar kiradi?
Odatda shampun tarkibiga 10 dan 30 gacha bo‘lgan faol komponentlar kiradi. Mutaxassislar ular orasida quyidagilarni ajratib ko‘rsatishadi:
* Tozalash vositalari (shampunning barqarorligiga yordam beradi);
* Sochlarga yumshoqlik va jilo beruvchi vositalar;
* Sochlarning chigallashishiga to‘sqinlik qiluvchi vositalar;
* Muayyan muammolarni hal qilishga mo‘ljallangan vositalar (qazg‘oq, sochlarning yog‘liligi va boshqalar);
* Konservantlar, parabenlar, benzofenonlar;
* Propilen glikol, E vitamini;
* Suv, sirt faol moddalar, yumshatuvchi komponentlar;
* Quyultirgichlar, konservantlar (mahsulotning ishlatishda yoqimli va barqaror bo‘lishiga yordam beradi).
Albatta, baʼzi komponentlarga nisbatan taʼsirlanishlar bo‘lishi mumkin, ammo bu shampunlardan foydalanish mumkin emas degani emas. Kosmetika ishlab chiqaruvchilari uchun zararli hisoblangan, lekin ruxsat etilgan konservantlar ro‘yxati qonunchilik bilan belgilab qo‘yilgan. Shuning uchun do‘kon javonida xavfli vositani topish deyarli imkonsiz.
Shampunni qanday tanlash kerak?
Dermatolog Yekaterina Kandinskaya shampunni o‘z ehtiyojlaringizdan kelib chiqib tanlashni maslahat beradi. “Agar bosh teringiz yog‘lanishga moyil bo‘lsa, unda bu turga mo‘ljallangan shampunlarni tanlaganingiz maʼqul. Shuni yodda tutish kerakki, aynan siz uchun mukammal shampun mavjud bo‘lib, u nafaqat o‘z vazifasini bajaradi va taʼsirlanishni keltirib chiqarmaydi, balki foydalanish uchun ham yoqimli va qulaydir”, deydi u.
Shampun saratonga sabab bo‘lishi mumkinmi?
Turli manbalarda soch shampuni baʼzi komponentlarining (masalan, benzol) potensial xavfi haqida maʼlumot topish mumkin bo‘lsa-da, hozirgi vaqtda formaldegidning saratonga olib kelishi haqida hech qanday tadqiqot yo‘q. Odatda faqat katta konsentratsiyalarda nafas olayotgan kosmetika ishlab chiqarish xodimlari xavf ostida. Bu kosmetika yoki isteʼmolchiga taalluqli emas. Ikkala ekspert ham shampun saratonga sabab bo‘lishi mumkin emasligini tasdiqlashdi.
Izoh (0)