Kollagen — inson organizmida eng ko‘p tarqalgan oqsil bo‘lib, u teri, suyaklar, mushak va bog‘lovchi to‘qimalarning asosidir. Ispan olimlari kollagen qo‘shimchalari tana massasini kamaytirishga yordam beradimi, degan savolga javob topish uchun tadqiqot o‘tkazdi.
Eksperiment ishtirokchilari 12 hafta davomida kuniga ikki marta kollagen bilan boyitilgan oqsilli batonchiklarni iste’mol qildi.
Batonchik tarkibidagi kollagen maxsus ishlov berilgan bo‘lib, u oshqozonda kengayib, suvni ushlab turishga yordam beradi va shu tariqa to‘qlik hissini kuchaytiradi. Har bir batonchikda 10 gramm kollagen, jami 90 kaloriya, deyarli 9 gramm oqsil, 7 grammdan ortiq uglevod, 3,2 gramm yog‘ va 2,5 gramm to‘qima tolalari mavjud edi. Kollagendan tashqari, batonchik tarkibida qora shokolad, oziq-ovqat tolalari, sirop, soya oqsili va kungaboqar yog‘i ham bor edi.
Eksperimentda 20 dan 65 yoshgacha bo‘lgan ortiqcha vaznga ega 64 kishi ishtirok etdi. Bir guruhga batonchiklarni kuniga ikki marta — tushlik va kechki ovqatdan 45 daqiqa oldin, bir stakan suv bilan yeyish taklif qilindi. Ikkinchi guruh esa shu vaqt ichida faqat suv ichdi. Oradan 12 hafta o‘tgach, kollagenli batonchiklarni iste’mol qilgan ishtirokchilar o‘rtacha 3 kg vazn yo‘qotishgan. Ikkinchi guruh esa taxminan 1,5 kiloga ozishni qayd etgan.
Bundan tashqari, birinchi guruhdagi ishtirokchilarda qon bosimi pasaydi va jigar faoliyati ko‘rsatkichlari yaxshilandi. Eng muhimi, vazn yo‘qotish mushak massasini yo‘qotmasdan amalga oshdi — bu holat ko‘pincha ozishda uchraydi.
Olimlar to‘qlik hissini kollagenning oshqozonda hajmini oshirish qobiliyati bilan bog‘liqligini taxmin qilishadi. Bundan tashqari, kollagen ichak mikrobiotasining tarkibiga ijobiy ta’sir ko‘rsatishi mumkin. U oshqozon-ichak tizimining yuqori bo‘limlarida yomon so‘riladi va qalin ichakka yetib borgach, foydali bakteriyalar uchun ozuqa bo‘lib xizmat qiladi. Natijada organizmdagi yallig‘lanish darajasini kamaytiruvchi qisqa zanjirli yog‘ kislotalari hosil bo‘ladi. Bundan tashqari, kollagen boshqa oqsillarga nisbatan odatda hazm qilish uchun ko‘proq energiya talab qiladi.
Qiziqarli natijalarga qaramay, tadqiqotning cheklovlarini ham inobatga olish lozim. Ishtirokchilar sonining kamligi va kuzatuv muddati qisqaligi (bor-yo‘g‘i 12 hafta) kollagenning tana vazniga ta’siri haqida aniq xulosa chiqarishga imkon bermaydi. Bundan tashqari, batonchiklar tarkibida faqat kollagen emas, balki kletchatka, oqsil, shakar o‘rnini bosuvchi moddalar va boshqa foydali elementlar ham bo‘lgan. Ehtimol, vazn yo‘qotish aynan shu moddalar kombinatsiyasi tufayli yuzaga kelgan bo‘lishi mumkin.
Mutaxassislar fikricha, sinovdan o‘tgan hamda retsept bo‘yicha qabul qilinadigan kollagen bezarar.
Semizlik — murakkab kasallik bo‘lib, u kompleks yondashuvni talab qiladi. Kollagenni vazn yo‘qotish strategiyasiga kiritishdan oldin shifokor yoki diyetolog bilan maslahatlashish tavsiya etiladi.
Izoh (0)