21-yanvar kuni Rossiyaning Tomsk viloyati, Asino tumani, Prichulmskiy aholi yashash punktidagi bir qavatli yog‘ochdan qurilgan uyda yong‘in chiqishi oqibatida shu yerda yashab, ishlagan 11 nafar O‘zbekiston fuqarosi vafot etdi. Halok bo‘lgan fuqarolarning 9 nafari Navoiy viloyatining Qiziltepa tumanidan, bir nafari Samarqand viloyatining Kattaqo‘rg‘on tumanidan, yana biri Andijon viloyatining Andijon tumanidan. “Daryo” muxbiri Laylo Hayitova Qiziltepa tumanida bo‘lib, marhumlarning oila-a’zolari bilan suhbatda bo‘ldi.
Yong‘in oqibatida halok bo‘lgan qiziltepaliklarning yetti nafari 20–25 yosh atrofida bo‘lgan.
Shahzod Murtazoyev (1999-yil), Temur Elmurodov (1994), Hoshimjon Ergashev (1999), Bunyod Hasanov (1994), Muhammadali Zokirov (1998)lar tumandagi “Miltiqchi” mahallasidan. Xurshid Mo‘minov (1997), Ramziddin G‘aybulloyev (1998), Mehriddin Norov (1966), Keldiyor Boymurodov (1987)lar esa “Gumbaz”, “Madaniyat”, “Oqsoch” mahallalarida istiqomat qilgan.
Tashqaridagi va ichkaridagi mehnat muhojirlari haqida boshqa materiallar:
Ma’lum bo‘lishicha, vafot etganlarning aksariyati biri-biriga yaqin qavm-qarindoshlar. Ramziddin G‘aybulloyev Mehriddin Norov bilan ota-bola bo‘lsa, Temur Elmurodov Mehriddin Norovning singlisining o‘g‘li. Kattaqo‘rg‘onda istiqomat qilgan Umid Hasanov esa Bunyod Hasanov bilan aka-uka edi.
Temur Elmurodovning onasi Mavluda Norovaning so‘zlariga ko‘ra, o‘g‘lining vafot etganini eshitganidan so‘ng eri insult bo‘lgan.
Bir yo‘la o‘g‘lim, akam va jiyanimdan judo bo‘ldim. Ularsiz qanday yashayman. Aksiga olib, otasi ham Rossiyada. O‘g‘limiz Temurbekdan ayrilganimizni eshitgach, miyasiga qon quyilib, insult bo‘libdi. Kasalxonaga yotqizishibdi. Dardimni kimga aytay, qaysi devorga boshimni uray. Oxirgi suhbatlashganimda tizza bo‘yi qor yoqqani uchun hozircha ishlashmayotganini aytgandiMarhumning opasi Xushvaqt Elmurodova esa mudhish voqea sodir bo‘lgan kuni ukasi bilan 3,5 soatdan ko‘proq vaqt Imo messenjeri orqali suhbatda bo‘lgan. Temur 3–4 oydan buyon mehnat haqini olishmayotgani, yashash joyida tok yo‘qligidan norozi bo‘lib gapirgan.Mavluda Norova, Temur Elmurodovning onasi
Men ham Rossiyaning boshqa viloyatida ishlayman. O‘sha kun voqea sodir bo‘lishidan oldin ukam bilan qorong‘ida uzoq gaplashdim. U: “Opa, telefonni o‘chiring, endi uxlay, uch soatdan keyin ishga chiqaman”, deb aytdi. Yashash uylari yog‘ochdan bo‘lsa-da, sharoiti yaxshi edi. Ammo uyni hech qachon elektr pechka bilan isitishgan emas. Navbatma-navbat o‘tin yoqishardi.Xushvaqt Elmurodova, Temur Elmurodovning opasi
Navoiy viloyati hokimligi va Qiziltepa tuman hokimligi faollari vafot etganlarning xonadonlarida bo‘lib, ularning oila a’zolariga hamdardlik bildiryapti. Moddiy yordamdan tashqari, malakali shifokorlar tomonidan tibbiy va ruhiy yordam ham ko‘rsatilmoqda.
Marhum Hoshimjon Ergashevning xonadonida bo‘lganimizda onaizorning ruhan o‘zida emasligini anglash qiyin kechmadi. Bolasining kollejni bitirib, oliy o‘quv dargohiga kirolmagach, dunyo ko‘ray, o‘zgaray, deb o‘zga yurtga ishlash uchun ketishga qilgan qaroriga rozi bo‘lganidan ming bor afsusda.
Bolaligidan mehnatda pishgan edi-da, bolaginam. Ne-ne umidlar bilan yangi boshlab qo‘ygan imorati huvillab qoldi. O‘quvchilik paytlari ham ota-onamning sog‘ligi yo‘q, ro‘zg‘orga pul topay, deb novvoylik, oshpazlik qilardi bolaginam. Marosim kuni ham tobutining boshiga qo‘lida non ushlab, kulib turgan suratini qo‘yishdi. O‘zi birinchi bor chetga chiqqandi, endigina to‘rt oy bo‘lgandi.Hoshimjon Ergashevning onasi
Marhum Bunyod Hasanovning xonadonida akasi Umid Hasanovning ham ta’ziya marosimi o‘tkazilgan. Aka-ukaning ammasi Dilorom Hasanovaning so‘zlariga ko‘ra, Bunyod fojiadan oldin onasi bilan telefonda gaplashgan.
Hozir ukam va kelinimiz juda og‘ir ahvolda. Umidjonimizning to‘rt nafar bolasi otasiz qoldi. Bunyodimiz esa hali uylanmagan, yosh edi. Sportga juda qiziqardi. Kelinning aytishicha, o‘sha kuni u o‘g‘li bilan kechki soat 23:30 largacha telefon orqali gaplashib, dardlashgan. Kutilmaganda shovqin, to‘s-to‘polon boshlangan va “taraq-turuq” qilib, telefon o‘chib qolgan. Shu bilan Bunyod bilan qayta bog‘lanish imkoni bo‘lmagan.Dilorom Hasanova, Bunyod va Umid Hasanovlarning ammasi
Dilorom Hasanovaning so‘zlariga ko‘ra, Bunyod onasi bilan Toshkent vaqti bilan soat 23:30 (Tomsk vaqti bilan 01:30) gacha telefon orqali gaplashgan. Rossiya Favqulodda vaziyatlar vazirligi ma’lumoti bo‘yicha yong‘in haqidagi ma’lumot Tomsk vaqti bilan 04:05 da kelib tushgan. 06:35 ga kelib yong‘in to‘liq bartaraf etilgan.
Dilorom Hasanovaga ko‘ra, bu mudhish voqea sodir bo‘lishidan bir necha kun oldin jiyani unga telefon qilgan. Qiziltepalik migrantlar O‘zbekiston bayrog‘ini silkitib, uni o‘rmon ichidagi o‘zlari yashaydigan yog‘och uy shiftiga ilgan. “O‘zbekistonning ana shunday baquvvat yigitlari bor”, — deya g‘ururlanib, O‘zbekiston madhiyasini ham kuylashgan. Ularning bu xatti-harakatlariga nisbatan esa ish boshqaruvchilar tomonidan qarshilik ko‘rsatilgan. “Bayrog‘ingni olib qo‘y, noningni yegin va ket bu yerdan!”, deya po‘pisa qilishgan.
“O‘zbekiston sha’nini himoya qilaman, deb juvonmarg bo‘lishdi”, — dedi Dilorom Hasanova.
Ma’lumot uchun: Yangi yil bayramida Rossiyaning Sankt-Peterburg shahridagi “Dvorsovaya” maydonida hamrohlarining yelkalariga o‘tirib olib, O‘zbekiston bayrog‘ini hilpiratgan mehnat muhojirlari politsiya e’tiborini tortgandi. Videoyozuvlar orqali politsiya 14 nafar O‘zbekiston va Tojikiston fuqarosini qidirib topgan. Tekshirilgan 14 kishining har birida migratsion kamchiliklar aniqlangan va ularning bir nechtasi deportatsiya qilingandi.
Izoh (0)