Prezident Shavkat Mirziyoyev 28-yanvar, seshanba kuni turizmni rivojlantirish, jismoniy tarbiya va sportni yanada ommalashtirish masalalari bo‘yicha yig‘ilish o‘tkazdi, deya xabar bermoqda Prezident matbuot xizmati.
Shavkat Mirziyoyev tomonidan joriy yil 24-yanvarda qabul qilingan “O‘zbekiston Respublikasida jismoniy tarbiya va sportni yanada takomillashtirish va ommalashtirish chora-tadbirlari to‘g‘risida”gi farmonga muvofiq, barcha tuman va shaharlarni kamida uchta sport turiga ixtisoslashtirish, bu orqali katta sportga sifatli zaxira shakllantirish tizimini yo‘lga qo‘yish chora-tadbirlari belgilangan.
Farmonda 2020-yilda 269 ta futbol, voleybol, basketbol va badminton maydoni, 178 ta boks, kurash, fitnes va gimnastika sport zali, 32 ta tennis korti qurish vazifasi qo‘yilgan hamda uning moliyaviy manbalari ham hal qilib berilgan. Yig‘ilishda farmondagi vazifalar ijrosi bilan bog‘liq masalalar ko‘rib chiqilgan.
Jismoniy tarbiya va sport vazirligiga har bir tuman kesimida tashabbuskorlarni aniqlab, Qurilish vazirligi bilan birgalikda arzon va energiya tejamkor sport inshootlari qurish bo‘yicha namunali loyihalarni tayyorlash topshirilgan.
Sport va jismoniy tarbiya bilan muntazam shug‘ullanadigan aholining umumiy sonini 2020-yilda 18 foizga, 2025-yilda esa 30 foizga yetkazish, shuningdek, 7 yoshdan 30 yoshgacha bo‘lgan yoshlarning kamida 30 foizini ommaviy sportga jalb qilish kerakligi ta’kidlandi.
O‘zbekistonda jahon hamda qit’a chempionatlari va boshqa nufuzli xalqaro sport musobaqalarini o‘tkazish orqali sport turizmini rivojlantirish lozimligi ko‘rsatib o‘tildi. Milliy sport turlari, xususan, kurashni yanada rivojlantirish, uni Olimpiya o‘yinlari dasturlariga kiritish muhimligi qayd etildi.
“Yig‘ilishda joriy yil Tokioda bo‘lib o‘tadigan Olimpiya va Paralimpiya o‘yinlariga tayyorgarlik masalasiga alohida e’tibor qaratildi”, — deya qo‘shimcha qilingan Prezident matbuot xizmati axborotida.
Izoh (0)