Президент Шавкат Мирзиёев 28 январь, сешанба куни туризмни ривожлантириш, жисмоний тарбия ва спортни янада оммалаштириш масалалари бўйича йиғилиш ўтказди, дея хабар бермоқда Президент матбуот хизмати.
Шавкат Мирзиёев томонидан жорий йил 24 январда қабул қилинган «Ўзбекистон Республикасида жисмоний тарбия ва спортни янада такомиллаштириш ва оммалаштириш чора-тадбирлари тўғрисида»ги фармонга мувофиқ, барча туман ва шаҳарларни камида учта спорт турига ихтисослаштириш, бу орқали катта спортга сифатли захира шакллантириш тизимини йўлга қўйиш чора-тадбирлари белгиланган.
Фармонда 2020 йилда 269 та футбол, волейбол, баскетбол ва бадминтон майдони, 178 та бокс, кураш, фитнес ва гимнастика спорт зали, 32 та теннис корти қуриш вазифаси қўйилган ҳамда унинг молиявий манбалари ҳам ҳал қилиб берилган. Йиғилишда фармондаги вазифалар ижроси билан боғлиқ масалалар кўриб чиқилган.
Жисмоний тарбия ва спорт вазирлигига ҳар бир туман кесимида ташаббускорларни аниқлаб, Қурилиш вазирлиги билан биргаликда арзон ва энергия тежамкор спорт иншоотлари қуриш бўйича намунали лойиҳаларни тайёрлаш топширилган.
Спорт ва жисмоний тарбия билан мунтазам шуғулланадиган аҳолининг умумий сонини 2020 йилда 18 фоизга, 2025 йилда эса 30 фоизга етказиш, шунингдек, 7 ёшдан 30 ёшгача бўлган ёшларнинг камида 30 фоизини оммавий спортга жалб қилиш кераклиги таъкидланди.
Ўзбекистонда жаҳон ҳамда қитъа чемпионатлари ва бошқа нуфузли халқаро спорт мусобақаларини ўтказиш орқали спорт туризмини ривожлантириш лозимлиги кўрсатиб ўтилди. Миллий спорт турлари, хусусан, курашни янада ривожлантириш, уни Олимпия ўйинлари дастурларига киритиш муҳимлиги қайд этилди.
«Йиғилишда жорий йил Токиода бўлиб ўтадиган Олимпия ва Паралимпия ўйинларига тайёргарлик масаласига алоҳида эътибор қаратилди», — дея қўшимча қилинган Президент матбуот хизмати ахборотида.
Изоҳ (0)