Prezident Shavkat Mirziyoyev parlament palatalarining qo‘shma majlisidagi ma’ruzasida ishsizlikni 7 foizgacha kamaytirish hukumat oldidagi eng muhim vazifalardan biri ekanligini ma’lum qildi.
“Aytilgan barcha rejalarni ro‘yobga chiqarish hisobiga ishsizlikni 7 foizgacha kamaytirish, yiliga kamida 500 mingta yangi ish o‘rinlarini yaratish, aholi daromadini 2 barobarga oshirish yangi hukumat oldidagi eng muhim vazifalar bo‘lishi shart.
Mana shu raqamlarni yangi hukumat bajarishi shart. Bajarmasa, barqarorlikka erisha olmaymiz. Mana shunday marralar olishimiz kerak.
Aholi daromadini ikki barobarga oshirmasak, odamlarimizni rozi qila olmaymiz. Besh yilda ayniqsa deputatlar, senatorlar, sizni saylagan saylovchilar norozi bo‘ladi. Bu – aniq raqamlar. Hisob-kitob qilingan raqamlar. Iloji bor raqamlar. Havoyi raqamlar emas”, – deydi Prezident.
Ma’lumot uchun, O‘zbekistonda mehnatga layoqatli aholi o‘rtasida ishsizlik darajasi rasman 8,9 foizni tashkil etadi. 2020-yilda 382 mingta doimiy yangi ish o‘rni yaratilishi prognoz qilinmoqda.
Eslatib o‘tamiz, O‘zbekistonda 2018-yili ishsizlik darajasi 9,3 foizni tashkil etgan bo‘lsa, 2019-yilgi hisob-kitoblarga ko‘ra, 8,9 foizga yetgan. Bundan avval 2020-yilda O‘zbekistonda ishsizlik nafaqasi ikki barobarga ko‘payishi haqida xabar berilgan edi.
Izoh (0)