“Bir oila — bir bola” siyosati bekor qilinganidan to‘rt yil o‘tib Xitoyda tug‘ilishlar soni tarixdagi eng past ko‘rsatkichga yetdi

2019-yilda Xitoyda tug‘ilishlar darajasi tarixiy minimumga tushib ketdi. Bu kabi ma’lumotlar Milliy statistika byurosi tomonidan taqdim etildi, deb xabar beradi Meduza.

2019-yilda mamlakatda tug‘ilish koeffitsiyenti har ming kishiga 10,48 ni tashkil etgan — bu 1949-yili Xitoy hukumati tepasiga kommunistlar kelgan davrdagi minimumga teng. Butun mamlakat bo‘ylab yil davomida 14,65 million bola tug‘ilgan — bu so‘nggi 59 yildagi eng past ko‘rsatkich.

South Chine Morning Post nashrining yozishicha, tahlilchilar buni “Bir oila — bir farzand” siyosatining bekor qilinganiga bog‘lamoqda. Chunki shu sabab mamlakatda reproduktiv yoshdagi ayollar soni sezilarli darajada kamaygan.

1980-yildan buyon Xitoyda amalda bo‘lgan “Bir oila — bir bola” siyosati 2015-yildan boshlab rasman bekor qilingan. Shundan so‘ng mamlakatda tug‘ilishlar soni keskin oshgan edi.