Erdo‘g‘on Liviyaga turk qo‘shinlarini yuborish boshlanganini ma’lum qildi

Turkiya Liviyaning xalqaro tan olingan hukumatini qo‘llab-quvvatlash maqsadida u yerga o‘z harbiylarini yuborishga kirishdi. Bu haqda Turkiya prezidenti Rajab Toyyib Erdo‘g‘onga tayanib, Reuters xabar berdi.

Erdo‘g‘onning ta’kidlashicha, Turkiya o‘z sarhadlarining janubiy chegaralaridagi vaziyatni barqarorlashtirish uchun barcha, jumladan, diplomatik usullardan foydalanish niyatida.

Erdo‘g‘on qo‘shin yuborish haqida rejasini Rossiya, Aljir, Buyuk Britaniya, Misr, BAA, Xitoy, AQSh, Turkiya va Fransiya vakillari ishtirokida Liviyadagi vaziyatni muhokama qilishga bag‘ishlab Berlinda o‘tkaziladigan yig‘ilishdan ikki kun oldin ma’lum qildi.

Eslatib o‘tamiz, Rossiya prezidenti Vladimir Putin va Turkiya yetakchisi Rajab Toyyib Erdo‘g‘on 8-yanvar kuni Istanbulda bo‘lib o‘tgan muzokaralar chog‘ida Liviyada jangovar harakatlarni to‘xtatish bo‘yicha tashabbus bilan chiqqandi. Biroq feldmarshal Xalif Xaftar boshchiligidagi Liviya milliy armiyasi o‘t ochishni to‘xtatish to‘g‘risidagi taklifni rad qilgan.