Joriy yil 10—12-aprel kunlari Qashqadaryoda “Lola va kabob sayli” sayli bo‘lib o‘tadi, deya xabar berdi “Qashqadaryo” gazetasi.
Ma’lum qilinishicha, sayil viloyatning G‘uzor tumanidagi adirliklarda tashkil etilib, vohada gastronomik turizmni rivojlantirish va Qashqadaryoning eng mashhur taomi – tandir go‘shtini mahalliy va chet ellik sayyohlar o‘rtasida yanada ommalashtirish nazarda tutilgan.
O‘zbekiston gastronomik turizm assotsiatsiyasi raisi Gulnoza Odilovaning aytishicha, “Lola va kabob sayli”ni Qashqadaryoda lolaqizg‘aldoqlar ochilgan vaqtda, bevosita lolazorda uch kunlik festival tarzida o‘tkazish rejalashtirilmoqda.
Shuningdek, joriy yil bahorda viloyatda milliy liboslar xalqaro festivali, ot sporti bo‘yicha nufuzli musobaqa hamda “Kashtalarda hayot porlaydi” kashtachilik buyumlari respublika ko‘rgazma savdosi o‘tkazilishi ham belgilangan.
Izoh (0)