Mingbuloq tumani hokimi Nurshod Xudoyberdiyev fermer xo‘jaliklari rahbarlarini kuzgi-qishki agrotexnik tadbirlar yig‘ilishi chog‘ida nojo‘ya so‘zlar bilan haqorat qilgani uchun Namangan viloyati ma’muriy sudi tomonidan Ma’muriy javobgarlik to‘g‘risidagi kodeksning 41-moddasida ko‘rsatilgan ma’muriy huquqbuzarlikni sodir etgan deb topildi. Bu haqda “Daryo” muxbiri Azizbek Abduvaliyev xabar bermoqda.
Viloyat sudi raisi Salohiddin Tursunov raisligida 10-yanvar kuni bo‘lib o‘tgan ochiq sud majlisida bergan ko‘rsatmasida Nurshod Xudoyberdiyev aybiga iqrorligini bildirib, ushbu nojo‘ya harakatlari joriy yil 3-yanvar kuni viloyat hokimi ishtirokidagi yig‘ilishda muhokama qilinib, unga jiddiy ogohlantirish berilgani, kelgusi ish faoliyatida muomala madaniyatiga qat’iy rioya qilishini bildirdi.
Sud Nurshod Xudoyberdiyevga jazo tayinlashda uning aybiga iqrorligi va qilmishidan pushaymonligini jazoni yengillashtiruvchi holatlar deb, qilmishini og‘irlashtiruvchi holatlar mavjud emas deb hisobladi. Sodir etilgan huquqbuzarlik harakatining xususiyati va jazoni yengillashtiruvchi holatlarini inobatga olib, unga nisbatan qonun sanksiyasida nazarda tutilgan jarima jazosi tayinlashni lozim topdi.
Avval xabar berilganidek, sud Nurshod Xudoyberdiyevga davlat foydasiga undirish uchun bazaviy hisoblash miqdorining yigirma barobari, ya’ni 4 million 460 ming so‘m jarima jazosi tayinladi.
Izoh (0)