Rossiya davlat dumasi deputatlar ahloqi komissiyasi rahbari Otari Arshba Rossiya liberal demokratik partiyasi yetakchisi Vladimir Jirinovskiyni bolalar, nogironlar, yetimlar hamda “xoloplar”ga pullar va “chebureklar” ulashgani uchun jazolamoqchi. Bu haqda “Nsn.fm” xabar bergan.
Arshbaning so‘zlariga ko‘ra, deputatlar Jirinovskiyga uning so‘zlari va qilgan ishi noto‘g‘ri ekanini tushuntirishga urinadi va uni odamlardan uzr so‘rashga chaqiradi. Shuningdek, siyosatchi OAVni ham deputatlik qoidabuzarligi kuzatilgani haqida xabardor qilishi lozim. Komissiya rahbarining so‘zlariga ko‘ra parlamentariy avval ahloq me’yorlarining buzilishi uchun Davlat dumasining bir yoki bir nechta majlisiga kiritmaslik huquqiga ega edi, biroq hozir ushbu chora qo‘llanilmaydi.
Arshba aksiya ishtirokchilari orasida jabrlanganlar yo‘qligini qayd etib, bordi-yu bu borada murojaat kelib tushsa, u qonunchilik asosida ko‘rib chiqilishini bildirgan.
Vladimir Jirinovskiy Qizil maydonda joriy yilning 5-yanvar kuni Shahar univermagi yaqinidagi yarmarkada aylanib yurib, “Bolalar, nogironlar, yana kim bor? Yetimlar, krepostnoylar, qullar”, — deya hayqirib, ming rubl qiymatidagi kupyuralarni odamlarga tarqatgan. Ushbu hodisa deputatning Instagram-akkauntida to‘g‘ridan-to‘g‘ri translyatsiya qilingan.
Keyinroq Arshba RLDP yetakchisining ushbu xatti-harakati ahloqiy komissiya tomonidan ko‘rib chiqilishini aytgan. Uning aytishicha, ushbu masala parlamentariy tomonidan 12-yanvardan keyin ko‘rib chiqiladi.
Izoh (0)