Eronning Kirmon shahrida bo‘lib o‘tayotgan general Qosim Sulaymoniyning dafn marosimi u bilan vidolashish istagidagilarning haddan tashqari ko‘pligi bois boshqa sanaga qoldirildi. Bu haqda, Press TV telekanaliga asoslanib, “RIA Novosti” agentligi xabar bermoqda.
Sulaymoniyning ona shahri Kirmonda general bilan vidolashuv 7-yanvar, seshanba kuni boshlangan edi. Keyinchalik motam yurishi davomida yuz bergan tiqilinch oqibatida 40 kishi halok bo‘ldi va 200 dan ortiq odam tan jarohati olgani ma’lum bo‘ldi.
Press TV telekanalining xabar berishicha, Sulaymoniy bilan vidolashuv jarayoni Kirmonda juda katta olomon to‘plangani bois qoldirilgan. Qayd etishlaricha, shaharga “millionlab azadorlar yig‘ilgan”.Associated Press’ning aniqlik kiritishicha, Tehronda 6 yanvar kuni bo‘lib o‘tgan motam yurishida milliondan ortiq odam ishtirok etgan. 4 yanvar kuni Bag‘dodning shialar yashaydigan hududida ham general bilan vidolashuv bo‘lib o‘tgan edi.
General Qosim Sulaymoniy 3 yanvar kuni, AQSh aviazarbasi oqibatida halok bo‘lgan edi. Pentagon bayonotiga ko‘ra, eronlik general AQSh prezidentining buyrug‘iga ko‘ra o‘ldirilgan — Tramp Sulaymoniyni birinchi raqamli terrorchi deb atagan edi.
Izoh (0)