“O‘zbekipaksanoat”: Yilda 4 marta ipak qurti boqish natijasida salkam 20 ming tonna pilla yetishtirildi
“O‘zbekipaksanoat” uyushmasi tomonidan 2019-yilda 2 248,5 gektar yer maydonida yangi tutzorlar tashkil etilib, tut plantatsiyalari qoshida 652 tadan ziyod qurtxonalar qurildi. Shuningdek, 11 ta pillani qayta ishlash korxonasi modernizatsiya qilindi, 15 ta yangi pillani qayta ishlash, ipak qurti urug‘ini va boshqa turdagi mahsulotlarni ishlab chiqarish korxonalari ishga tushirildi. Bu haqda 7-yanvar kuni AOKAda “O‘zbekipaksanoat” uyushmasi tomonidan o‘tkazilgan matbuot anjumanida ma’lum qilindi, deya xabar bermoqda “Daryo” muxbiri.
Ma’lum qilinishicha, o‘tgan yili O‘zbekiston tarixida ilk bor bir yilda 4 marta ipak qurti boqish va hosil olish tartibi yo‘lga qo‘yildi. Natijada 19 607 tonna pilla yetishtirildi. Bu ko‘rsatkich 2018-yilga nisbatan 1,6 ming tonna yoki 8 foizga ko‘p. Yil davomida yetishtirilgan pillaning 70 foizini qayta ishlashga erishib, 70 million dollar miqdordagi mahsulot eksporti amalga oshirilgan.
“Import o‘rnini bosuvchi 150 ming quti sanoatbop ipak qurti urug‘ini o‘zimizda ishlab chiqardik. Bu juda katta ko‘rsatkich. Chunki shu vaqtga qadar O‘zbekistonda yetishtiriladigan pilla xomashyosini yetishtirish uchun 100 foiz ipak qurtlarini import qilardik. Oldinlari ipak qurti urug‘i yetishtiradigan korxonalar ishlagan, lekin ularda innovatsion ishlanmalar yetishmaganligi, ipak qurti urug‘larining sifati pasayib ketganligi, zotlarning buzilganligi tufayli 2017-yilgacha faoliyati qoniqarli darajada emas edi. Ular faqat “skalat”ga ishlagan, ularni ipak qurti o‘rab olgan, ammo hech kim boqmagan”, — dedi “O‘zbekipaksanoat” uyushmasi rais o‘rinbosari Olimjon Jumayev.
Tadbirda aytilishicha, 2019-yilda sohaga salkam 68 million dollar miqdorida investitsiya kiritildi. Uning 33 million dollari to‘g‘ridan-to‘g‘ri xorijiy investitsiyalarni tashkil etadi.
Xususan, “Afghan Bazar Carpets” GmbH kompaniyasi bilan hamkorlikda O‘zbekistonda sifatli ipakli gilamlarni ishlab chiqarishni yo‘lga qo‘yish bo‘yicha kelishuvga erishildi. Ruminiya va Yaponiya institutlari bilan Ipakchilik ilmiy-tadqiqot instituti o‘rtasida tajriba almashish hamda qo‘shma loyihalar asosida tadqiqotlar olib borish belgilab olindi. Pillachilik va ipakchilik sohalarida Ozarbayjon bilan ham hamkorlik aloqalari o‘rnatilib, Ozarbayjon sanoat korporatsiyasi bilan anglashuv Memorandumi imzolandi. Hozirda Birlashgan Millatlar Tashkilotining Oziq-ovqat va qishloq xo‘jaligi sohasidagi tashkiloti (FAO) bilan bir yillik 120 ming dollarga teng loyiha amalga oshirilmoqda.
