DXX Chegara qo‘shinlari o‘zbek—qirg‘iz chegarasida sodir bo‘lgan mojaro tafsilotlarini ma’lum qildi

Qirg‘iziston—O‘zbekiston davlat chegarasida janjal kelib chiqib, Qirg‘iziston fuqarolari va O‘zbekiston chegarachilari o‘rtasida ziddiyat yuz bergani haqida xabar berilgan edi. DXX Chegara qo‘shinlari matbuot xizmati voqea bo‘yicha rasmiy bayonot berdi.

Ma’lum bo‘lishicha, 6-yanvar kuni soat taxminan 13:30 da Namanganning Pop tumani hududida O‘zbekiston chegarachilari chegarani buzgan shaxslarni payqagan. Ular O‘zbekiston—Qirg‘iziston chegarasidan 1,5 kilometr masofa ichkariga kirib, 500 boshga yaqin mayda shoxli qoramolni o‘tlatgan.

Chegarachilar hodisa joyiga kelgunicha qirg‘izistonlik cho‘ponlar podaning katta qismini Qirg‘izistonga haydab chiqarishga ulgurgan. “Ikki tomonlama kelishuvlarga muvofiq, O‘zbekiston chegarachilari qoramol hamda qo‘shni davlat fuqarolarini Qirg‘iziston hududiga chiqarib yuborgan”, — deyiladi xabarda.

Holat bo‘yicha O‘zbekiston va Qirg‘iziston chegara idoralari vakillari o‘rtasida uchrashuv bo‘lib o‘tgan, chegara hududi aholisi o‘rtasida tushuntirish ishlari olib borilmoqda.