3-yanvar, juma kuni jinoyat ishlari bo‘yicha Samarqand viloyat sudi kassatsiya instansiyasi sudlov hay’atida jinoyat ishlari bo‘yicha Samarqand viloyat sudining 2017-yil 7-sentabrdagi hukmiga asosan O‘zbekiston Respublikasi Jinoyat Kodeksining 97-moddasi 2-qismi “j” va “p” bandlari bilan sudlangan A.Rahmonov tomonidan keltirilgan kassatsiya shikoyati kassatsiya tartibida ko‘rib chiqildi. Bu haqda “Daryo” muxbiri Farhod Norbo‘tayev xabar bermoqda.
Sud hukmiga ko‘ra, A.Rahmonovga O‘zbekiston Respublikasi Jinoyat Kodeksining 97-moddasi 2-qismi “j” va ”p” bandlari bilan 17 yil muddatga ozodlikdan mahrum qilish jazosi tayinlangan, jazoni umumiy tartibli koloniyalarda o‘tash belgilangan.
Ma’lum bo‘lishicha, 2017-yilning 20-mart kuni soat taxminan 23:00 atrofida A.Rahmonov va Sh.Sattorov guruh bo‘lib, oldindan til biriktirgan holda Kattaqo‘rg‘on tumani “Girdiqo‘rg‘on” QFY Jarboshi qishlog‘ida yashovchi B.Rahmonovni oralarida bir necha yillardan buyon mavjud bo‘lgan o‘zaro kelishmovchilik sababli o‘ldirishni reja qilgan.
Ular B.Rahmonovni Sh.Sattorov boshqaruvida bo‘lgan Tico avtomashinasi bilan “Moybuloq” QFY Qoqsoy qishlog‘i hududida joylashgan “Qirq to‘ra” dala maydoniga olib borib, o‘ta shafqatsizlik bilan uning ustiga benzin yoqilg‘isini sepgan va yoqib yuborgan. B.Rahmonov olovdan o‘lmagani sababli ikki sherik uni o‘sha yerdagi jarlikka itarib yuborgan. Ular jinoiy niyatini oxiriga yetkazish maqsadida B.Rahmonovni mazkur jarlikka ko‘mgan.
Sudlangan A.Rahmonovning shikoyatida, uning harakatlarida O‘zbekiston Respublikasi Jinoyat Kodeksining 97-moddasi 2-qismi “j“ va “p” bandlarida nazarda tutilgan jinoyat alomatlari yo‘qligi sababli uning harakatlarini Jinoyat Kodeksining 97-moddasi 2-qismi “j” va “p” bandlaridan 241-moddasiga qayta kvalifikatsiya qilib, jazodan ozod qilishni so‘ragan.
Sudlov hay’ati ish bo‘yicha A.Rahmonovning shaxsini tavsiflovchi obyektiv va ijtimoiy omillarni, jazosini yengillashtiruvchi va og‘irlashtiruvchi holatlarni, sodir etilgan jinoyatning xususiyati va ijtimoiy xavflilik darajasini huquqiy baholab, jamiyatdan ajratilmagan holda axloqan tuzalish imkoniyati mavjud emas degan xulosaga keldi. Unga nisbatan chiqarilgan sud hukmi o‘zgartirishsiz qoldirildi va kassatsiya shikoyati qanoatlantirilmadi.
Izoh (0)