Bekobodda bog‘cha mudirasini ishdan bo‘shatish maqsadida bolalarni zaharlamoqchi bo‘lgan ayollarning audioyozuvi tarqalgani va bu holat bo‘yicha tekshiruv boshlangani haqida xabar berilgan edi.
Toshkent viloyati IIBB mazkur audioyozuvdagi ishtirokchilardan biri bilan suhbat o‘tkazdi.
Ma’lum qilinishicha, ushbu audiyozuvda Bekobod tumanidagi “Gulnoza fayz omad” fermer xo‘jaligi rahbari S.K. va Bekobod tumani Maktabgacha ta’lim boshqarmasida muqaddam hisobchi bo‘lib ishlagan F.S.ning suhbati aks etgan.
Mazkur holat yuzasidan tuman prokuraturasiga murojaat qilgan S.K.ning so‘zlariga ko‘ra, u 2019-yilning dekabr oyida o‘z jiyanini bolalar bog‘chasiga qayta ishga tiklash ishlari bilan yurgan vaqtda F.S. bilan tanishgan. F.S. bog‘cha mudirasidan va boshqarma boshlig‘idan norozi ekanligini, nohaq ishdan bo‘shatilganligini aytgan. S.K. ham, o‘z navbatida, shunday muammoga duch kelganligini ma’lum qilgan.
S.K.ning so‘zlariga ko‘ra, F.S. uning telefon raqamini olgan va ikki kundan keyin unga telefon qilib, bog‘cha bolalarini zaharlab, rahbarlarning ishdan bo‘shatilishiga erishish va shu orqali o‘z maqsadlariga erishish rejasini ma’lum qilgan.
Ayolning aytishicha, u F.S.ning mazkur rejasidan dovdirab qolgan, chunki F.S. aytgan bog‘chada uning nabiralari ham tarbiyalanayotgan edi. Shu sababli u F.S.ning so‘zlarini bo‘lmasdan oxirigacha eshitgan va uni o‘z telefoniga yozib olgan. Suhbatdan so‘ng S.K. bu audioyozuvni tuman hokimiligiga olib borgan.
S.K.ning qayd etishicha, uning F.S. tomonidan berilgan taklifga rozi bo‘lishiga sabab aynan ana shu bog‘chaga uning nabiralari ham borishi sabab bo‘lgan. Ya’ni S.K. F.S.ning taklifiga rozi bo‘lishi orqali u mazkur reja boshqa kishilar yordamida amalga oshirilishining oldini olishga uringan.
Izoh (0)