3 январь, жума куни жиноят ишлари бўйича Самарқанд вилоят суди кассация инстанцияси судлов ҳайъатида жиноят ишлари бўйича Самарқанд вилоят судининг 2017 йил 7 сентябрдаги ҳукмига асосан Ўзбекистон Республикаси Жиноят Кодексининг 97-моддаси 2-қисми «ж» ва «п» бандлари билан судланган А.Раҳмонов томонидан келтирилган кассация шикояти кассация тартибида кўриб чиқилди. Бу ҳақда «Дарё» мухбири Фарҳод Норбўтаев хабар бермоқда.
Суд ҳукмига кўра, А.Раҳмоновга Ўзбекистон Республикаси Жиноят Кодексининг 97-моддаси 2-қисми «ж» ва »п» бандлари билан 17 йил муддатга озодликдан маҳрум қилиш жазоси тайинланган, жазони умумий тартибли колонияларда ўташ белгиланган.
Маълум бўлишича, 2017 йилнинг 20 март куни соат тахминан 23:00 атрофида А.Раҳмонов ва Ш.Сатторов гуруҳ бўлиб, олдиндан тил бириктирган ҳолда Каттақўрғон тумани «Гирдиқўрғон» ҚФЙ Жарбоши қишлоғида яшовчи Б.Раҳмоновни ораларида бир неча йиллардан буён мавжуд бўлган ўзаро келишмовчилик сабабли ўлдиришни режа қилган.
Улар Б.Раҳмоновни Ш.Сатторов бошқарувида бўлган Tico автомашинаси билан «Мойбулоқ» ҚФЙ Қоқсой қишлоғи ҳудудида жойлашган «Қирқ тўра» дала майдонига олиб бориб, ўта шафқатсизлик билан унинг устига бензин ёқилғисини сепган ва ёқиб юборган. Б.Раҳмонов оловдан ўлмагани сабабли икки шерик уни ўша ердаги жарликка итариб юборган. Улар жиноий ниятини охирига етказиш мақсадида Б.Раҳмоновни мазкур жарликка кўмган.
Судланган А.Раҳмоновнинг шикоятида, унинг ҳаракатларида Ўзбекистон Республикаси Жиноят Кодексининг 97-моддаси 2-қисми «ж« ва «п» бандларида назарда тутилган жиноят аломатлари йўқлиги сабабли унинг ҳаракатларини Жиноят Кодексининг 97-моддаси 2-қисми «ж» ва «п» бандларидан 241-моддасига қайта квалификация қилиб, жазодан озод қилишни сўраган.
Судлов ҳайъати иш бўйича А.Раҳмоновнинг шахсини тавсифловчи объектив ва ижтимоий омилларни, жазосини енгиллаштирувчи ва оғирлаштирувчи ҳолатларни, содир этилган жиноятнинг хусусияти ва ижтимоий хавфлилик даражасини ҳуқуқий баҳолаб, жамиятдан ажратилмаган ҳолда ахлоқан тузалиш имконияти мавжуд эмас деган хулосага келди. Унга нисбатан чиқарилган суд ҳукми ўзгартиришсиз қолдирилди ва кассация шикояти қаноатлантирилмади.
Изоҳ (0)